Ռուսաստանը ԵԱՀԿ Մինսկի խմբի համանախագահներից մեկն է ղարաբաղյան հակամարտության կարգավորման հարցում եւ որպես միջնորդ չպետք է ռազմականացնի տարածաշրջանը եւ բարձրացնի կոնֆլիկտային իրավիճակների մակարդակը: Նման կարծիք «Ռուսական զենքի վաճառքը Ադրբեջանին. հարված հայ-ռուսական հարաբերություններին կամ բիզնես շահեր» քննարկման ժամանակ հայտնեց Գլոբալիզացիայի եւ տարածաշրջանային հետազոտությունների վերլուծական կենտրոնի ղեկավար Ստեփան Գրիգորյանը:
Նրա խոսքով՝ եթե Ռուսաստանը զինում է հակամարտության երկու կողմերին էլ, դա նշանակում է, որ նա բարձրացնում է լարվածության մակարդակը տարածաշրջանում: «Ռուսաստանը լիարժեքորեն չի կատարում իր՝ միջնորդի պարտականությունները: Միջնորդը չի կարող աջակցել կողմերից մեկին եւ ռազմականացնել տարածաշրջանը: Էլ չեմ խոսում այն մասին, որ մենք Ռուսաստանի հետ ռազմավարական գործընկերներ ենք»,- նշեց Գրիգորյանը` հավելելով, որ հայկական կողմի հիմնական դժգոհությունը Կրեմլից պայմանավորված է այս երկու գործոններով:
Միեւնույն ժամանակ, ըստ փորձագետի, Մոսկվան կարող է զենք վաճառել հակամարտության կողմերին, սակայն՝ ոչ հարձակվողական գործողությունների համար նախատեսված ծանր տեսակի: