Աքաղաղի կանչն այնքան բարձր է, որ կարող է մարդուն խլացնել, եթե շատ մոտենա: Սրա հետ կապված գիտնականներին հետաքրքրել է, թե ինչու թռչունների մոտ լսողության խնդիրներ չեն առաջանում ծուղրուղու կանչելիս, հայտնում է «Մոյա պլանետան»:
Կենսաբանները 3 աքաղաղների գլխին ձայնագրող սարք են ամրացրել նրանց գանգի հիմնից ցածր: Կանչը ձգվել է 1-ից մինչեւ 2 վայրկյան, իսկ ձայնի ճնշման մակարդակը միջինը 130 դեցիբելի է հասել: Ըստ որում՝ աքաղաղներից մեկի կանչը հասել է 143 դեցիբելի, որը համեմատելի է թռչող հրթիռային օդանավի մոտ կանգնած լինելուն, հայտնում է Science պորտալը:
Այնուհետեւ միկրոտոմոգրաֆիայի միջոցով գիտնականները ստեղծել են աքաղաղի գանգի եռաչափ պատկերը: Արդյունքները ցույց են տվել, որ երբ թռչնի կտուցը ամբողջությամբ բաց է, ականջի խողովակի քառորդ մասը փակվում է, իսկ փափուկ հյուսվածքները 50 տոկոսով փակում են թմբկաթաղանթը: Սա նշանակում է, որ աքաղաղները սեփական կանչն առանձնապես չեն լսում:
Դրանից բացի, աքաղաղի կանչի ինտենսիվությունը տարածութայան վրա նվազում է, հավանաբար, այս պատճառով հարեւան հավերի լսողության զգալի կորուստ չի առաջացնում: