Հայաստանի Հանրապետական կուսակցության կողմից ՀՀ նախագահի թեկնածու առաջարկված Միացյալ Թագավորությունում ՀՀ Արտակարգ եւ լիազոր դեսպան Արմեն Սարգսյանը այցելել է Մոսկվայի հայկական եկեղեցի։
Ռուսաստանի եւ Նոր Նախիջեւանի հայոց թեմի մամլո դիվանից NEWS.am-ին հայտնում են, որ Ռուսաստանի եւ Նոր Նախիջեւանի հայոց թեմի առաջնորդ Տ․Եզրաս արք․ Ներսիսյանի առաջնորդությամբ դեսպանը եղել է Սուրբ Պայծառակերպություն Մայր տաճարում, մոմ վառել եւ ծանոթացել համալիրի կառուցման պատմությանը։
«Մոսկվայի Մայր տաճարն իմ տեսած բոլոր հայկական եկեղեցիների մեջ առանձնանում է իր ընդգծված հայկականությամբ եւ կոթողայնությամբ»,-ասել է Արմեն Սարգսյանը։
Զրույցի ընթացքում Թեմակալ առաջնորդը ներկայացրել է թեմի գործունեությունը հոգեւոր, կրթական, սոցիալական ոլորտում։Սրբազան հայրը տեղեկացրել է, որ թեմը 2017 թվականին մեծ շուքով տոնեց հիմնադրման 300-ամյակը եւ այսօր էլ հավատարիմ ծառայելով Աստծուն՝ պահպանում են նախնյաց ժառանգությունը։
«Մեր բարեպաշտ զավակների հոգեւոր կյանքի զորացման համար թեմի տարբեր համայքներում գործում է 41 եկեղեցի, կառուցվում՝ 14-ը, նորոգվում են հնամենի աղոթատները, տեղադրվում են խաչքարեր»,-ասել Եզրաս սրբազանը։
Արմեն Սարգսյանը բարձր գնահատելով թեմի գործունեությունը՝ նշել է, որ հատկապես հայրենիքից դուրս Հայ Եկեղեցին պատմական մեծ դերակատարություն ունի հայի ինքնության պահպանման գործում։ Դեսպանը խոսել է նաեւ հայ ժողովրդի հոգեւոր կյանքի եւ մշակույթի զարգացման գործում Հայ Եկեղեցու բացառիկ առաքելության մասին։
Հանդիպմանը ներկա են եղել Մոսկվայում ծառայող հոգեւորականներ, Գերագույն Հոգեւոր խորհրդի անդամ Ալեքսանդր Ալավերդյանը, բժշկական գիտությունների դոկտոր, ակադեմիկոս Արմայիս Քամալովը, տեխնիկական գիտությունների դոկտոր, ակադեմիկոս Գերոգի Սերոբյանը։
