ՀՀ ԳՆ սննդամթերքի անվտանգության պետական ծառայությունը վերահսկողության շրջանակներում հայտնաբերել է որդնած խուրմայի իրացման դեպք:
ՍԱՊԾ-ից NEWS.am-ին հայտնում են, որ շուկայում իրացվող եւ Ռուստաստանի Դաշնությունում փաթեթավորված՝ «Զամորսկի կուպեց» ապրանքանիշի խուրման թեեւ գտնվում է պիտանիության ժամկետի մեջ, սակայն այն որդնած է եւ պիտանի չէ որպես սնունդ օգտագործելու համար: ՍԱՊԾ տեսուչների կարգադրագրերով՝ նշված ապրանքանիշի խուրման վաճառքից հանվել է, քայլեր են ձեռնարկվում ներմուծված ամբողջ խմբաքանակը հայտնաբերելու ուղղությամբ:
«Ծառայությունը հրավիրում է սպառողների ուշադրությունը եւ առաջարկում ներկայացվող պիտակներով եւ 2017 թ. ապրիլի արտադրության (ժամկետի մեջ է մինչեւ 2018 թ. ապրիլ) խուրմայի վաճառքի դեպք արձանագրելու պարագայում չգնել այն եւ այդ մասին անմիջապես տեղեկացնել վերահսկող մարմնին՝ զանգահարելով «Թեժ գծին» 010206040 հեռախոսահամարով»,-ասված է հաղորդագրության մեջ: