Թայվանի ոստիկանությունն անցած հանգստյան օրերին Հաոսյուն քաղաքի նավահանգստում անցկացրած շուրջկալի ընթացքում ձկնորսական նավերից մեկից առգրավել է 1289 կգ կետամին, ինչը կղզու պատմության մեջ թմրանյութի ամենախոշոր խմբաքանակն է: «ՌԻԱ Նովոստի»-ի փոխանցմամբ՝ այս մասին նշված է քաղաքի դատախազության կայքում:
Թմրանյութերի դեմ պայքարի բաժնի աշխատակիցները նավահանգստում մի քանի շաբաթ հետաքննություն են անցկացրել եւ հետեւել, երբ տեղեկություն են ստացել, որ խոշոր թմրասինդիկատը սկսել է Հաոսյունի նավահանգստով Թայվան թմրանյութեր առաքել:
Sheng Li Man անունով նավին, որի մեջ հայտնաբերվել են արգելված նյութերը, ոստիկանությունը հետեւում էր դեռեւս հունվարից, քանի որ այն չափազանց հազվադեպ էր օգտագոծվում ձկնորսության համար: Անցած հանգստյան օրերին նավը ծով է դուրս եկել, իսկ ավելի ուշ հայտնել մարջանային կղզի Սյաոլյուցյուի մոտ խափանվելու մասին, որին օգնության է մեկնել երկրորդ նավը: Ոստիկանությունը 2 նավն էլ խուզարկել է նավահանգիստ վերադառնալուց հետո:
Իրավապահ մարմինների աշխատակիցները Sheng Li Man-ում խուզարկության ընթացքում հայտնաբերել են 126 սեւ պոլիէթիլենե փաթեթ, որոնք թաքցված էին նավի սառցախցիկի տակ: Ոստիկանության նախնական հաշվարկներով՝ խմբաքանակի արժեքը կազմում է մոտ 102 մլն դոլար:
Նավի կապիտանը ձերբակալված է, իսկ ինդոնեզական անձնագրերով 5 ձկնորսները ուղարվել են այն գործակալություն, որը նրանց աշխատանքի էր վերցրել, որտեղ նրանք ներկայումս հսկողության տակ են:
