«Ծառուկյան» խմբակցությունը հետ չի կանգնի ռեյտինգային ընտրակարգի դեմ պայքարից։ Պատգամավոր Վահե Էնֆիաջյանը NEWS.am-ի հետ զրույցում վստահեցրել է` անկախ ՀՀԿ-ական փոխխոսնակ Էդուարդ Շարմազանովի մեկնաբանություններից` հետ չեն կանգնելու:
Նշենք, որ այսօր Ազգային ժողովում լրագրողների հետ զրույցում Էդուարդ Շարմազանովը հայտարարել էր, որ ռեյտինգային ընտրակարգը ժողովրդավարական է եւ դրանից հրաժարվելու նպատակ չկա:
«Ծառուկյան» խմբակցությունը Ընտրական օրենսգրքում փոփոխություններ կատարելու` այն է ռեյտինգային ընտրակարգը ամբողջական համամասնական ընտրակարգի փոխելու նախագիծ է մշակել, որը քննարկման կներկայացնի երկու ամիս անց: ՀՅԴ խմբակցության պատգամավոր Արմեն Ռուստամյանն էլ է ասել, որ դեմ են այս կոնկրետ այս ընտրակարգին:
«Մեր նախաձեռնությունը որ սկսել ենք իրականացնել, շատ խորը ուսումնասիրություն ենք կատարել, թե տարբեր երկրներում ընտրական համակարգը ինչ մեխանիզմներով է տեղի ունենում եւ վերջին ընտրությունները մեր խմբակցության համար փաստ դարձան, որ այս ընտրական օրենսգիրքը մի շարք բացեր ու խնդրահարույց կետեր ունի: Մեր կողմից ներկայացված առաջարկությունը բխում է մեր ծրագրային դրույթներից եւ, առհասարակ, ժողովրդավարությունից`ունենալ հարյուր տոկոս համամասնական ընտրական ցուցակ: Չեմ պատրաստվում վերլուծել իր ասածները, մենք ունենք մեր նախաձեռնությունը, որը մինչեւ երկու ամիս ժամկետով հետաձգվել է: Երկու ամիս անց դարձյալ ընթացք կտանք դրան»,-ասել է Էնֆիաջյանը։
