Մյունխենում` ՀՀ նախագահի գլխավորած պատվիրակության կազմում գտնվող ԱԳ նախարար Էդվարդ Նալբանդյանն, այսօր՝ փետրվարի 17-ին, հանդիպել է Ճապոնիայի արտգործնախարար Տարո Կոնոին:
ԱԳՆ-ից NEWS.am-ին հայտնում են, որ ողջունելով ճապոնացի գործընկերոջը` նախարար Նալբանդյանը նշեց, որ այս շաբաթը Հայաստանում բավականին հագեցած է եղել ճապոնական օրակարգով՝ ստորագրվեց ներդրումների խրախուսման եւ պաշտպանության մասին համաձայնագիրը, Երեւանում էր գտնվում Ճապոնիայի փոխարտգործնախարարը։ Էդվարդ Նալբանդյանը խորհրդանշական համարեց, որ այս «ճապոնական շաբաթը» եզրափակվում է Հայաստանի եւ Ճապոնիայի արտգործնախարարների հանդիպումով։
Զրուցակիցներն ընդգծեցին, որ դիվանագիտական հարաբերությունների հաստատման քսանհինգ տարիների ընթացքում հայ-ճապոնական կապերը դինամիկ զարգացել են` ընդգրկելով համագործակցության բազմաթիվ ոլորտներ։
Էդվարդ Նալբանդյանը եւ Տարո Կոնոն գոհունակությամբ արձանագրեցին, որ Տոկիոյում եւ Երեւանում դեսպանությունների հիմնումը նոր լիցք հաղորդեց տարբեր բնագավառներում հայ-ճապոնական համագործակցությանը։
Հայաստանի եւ Ճապոնիայի արտաքին քաղաքական գերատեսչությունների ղեկավարներն անդրադարձան երկկողմ հարաբերությունների ընդլայնման եւ խորացման ուղղությամբ ձեռնարկվող համատեղ քայլերին։ Այս առումով Էդվարդ Նալբանդյանը եւ Տարո Կոնոն ընգծեցին երկկողմ հաճախակի շփումների ու փոխայցելությունների անհրաժեշտությունը։ Զրուցակիցները կարեւորեցին ԱԳՆ-երի միջեւ պարբերական խորհրդակցությունների անցկացումը, միջազգային կազմակերպությունների շրջանակներում արդյունավետ փոխգործակցությունը։
Նախարարները համակարծիք էին, որ Հայաստանի եւ Ճապոնիայի միջեւ ներդրումների ազատականացման, խրախուսման եւ պաշտպանության մասին համաձայնագիրը նոր հնարավորություններ է բացում առեւտրատնտեսական կապերի ընդլայնման համար։
Հանդիպման ընթացքում Հայաստանի եւ Ճապոնիայի արտաքին քաղաքական գերատեսչությունների ղեկավարների ուշադրության կենտրոնում էին տարածաշրջանային եւ միջազգային հրատապ մի շարք խնդիրներ:
Տարո Կոնոն Էդվարդ Նալբանդյանին տեղեկացրեց Կորեական թերակղզում տեղի ունեցող զարգացումների վերաբերյալ Ճապոնիայի մոտեցումների մասին։
Նախարար Նալբանդյանը Ճապոնիայի ԱԳՆ ղեկավարին ներկայացրեց Լեռնային Ղարաբաղի հիմնախնդրի բացառապես խաղաղ կարգավորման ուղղությամբ Հայաստանի եւ ԵԱՀԿ Մինսկի խմբի համանախագահ երկրների համատեղ ջանքերը:
.jpg)
