Քվինսլենդի (Ավստրալիա) համալսարանից սարդաբան Ռոբերտ Ռեյվենը հայտնաբերել է, որ թրթռման զգացողության ժամանակ սարդերը ինքնակառավարումը կորցնում են եւ շարժվում թրթռումների աղբյուրի ուղղությամբ, որպիսին են հաճախ դառնում լիահաղորդակ ավտոմեքենաները, հայտնում է «Մոյա պլանետան»:
Գիտնականը դեպք է հիշել, երբ Ավստրալիայից մի կին պատրաստվում էր դպրոցին դատի տալ անփութության համար, երբ որդու ուսապայուսակի մեջ սարդ էր հայտնաբերել: Սակայն Ռեյվենը նրան բացատրել է, որ սարդը պայուսակի մեջ է հայտնվել միանգամայն այլ կերպ՝ նա մտել է կնոջ լիահաղորդակ ավտոմեքենայի մեջ, երբ նա որդուն էր սպասում դպրոցի մոտ՝ մեքենայի շարժիչը չանջատած, հայտնում է Daily Mail-ը:
Ռեյվենը միեւնույն ժամանակ նշում է, որ նոր մեքենաները չափազանց ցածրաձայն են սարդերին գրավելու համար: Նրա խոսքով՝ սարդերն արձագանքում են միայն հին դիզելային ավտոմեքենաներին:
«Երբ այս հին դիզելային ավտոմեքենաներից մեկը կայանում եք, օրինակ, շոգ օրով ավազի վրա, սարդերը, որոնք սովորաբար ցերեկը չեն շարժվում, մեքենայի մոտ են վազում: Նրանք շատ անհանգստացած են»,- հայտնել է սարդաբանը:
Սարդերն իսկապես հաճախ են ավտոմեքենաների մեջ մտնում, եւ դա երբեմն տհաճ հետեւանքներ է ունենում: Այսպես՝ 2016 թվականին Ավստրալիայի մի բնակիչ մեքենայի մեջ ոսորդ սարդին նկատելով՝ իր մեքենան լճի մեջ սուզեց: