Քիշնեւում ամուսինը սպանել է 31-ամյա ֆոտոմոդել Անաստասիա Չեկատիին, հաղորդում է Sputnik Moldova-ն: Ոստիկանությունը գտել է կնոջ՝ պարանոցի հատվածում դանակից ստացված վնասվածքներով դիակը բնակարանում, որտեղ նա ապրում էր: Այնտեղ էր նաեւ զույգի երկու շաբաթական երեխան: Ենթադրյալ մարդասպանը՝ Չեկատիի ամուսին ատամնաբույժ Ալեքսեյ Միտակին, ինքնասպան է եղել:
Ինքնասպան լինելուց քիչ առաջ Միտակին զանգահարել էր հարազատներին եւ խնդրել հոգ տանել երեխայի մասին: Ընտանիքի անդամների խոսքով՝ ամուսինները վատ հարաբերությունների մեջ էին: Հաղորդվում է, որ Միտակին սիրուհի ուներ: Ֆոտոմոդելը Մոլդովայում հայտնի է Anastasia Cia կեղծանվամբ: Աղջիկը հայտնվում էր Playboy, Maxim եւ GQ ամսագրերի շապիկներին: Որպես մոդել նա հանդես էր գալիս 16 տարեկանից: Չեկատին նաեւ երգում էր եւ Youtube-ում իր ալիքն էր վարում, ուր տեղադրում էր իր մասնակցությամբ երաժշտական տեսահոլովակները: