Համապատասխան պետական մարմինը Ազգային ժողովին է ներկայացրել գրություն, որ Արմեն Սարգսյանը 2011 թվականից ՀՀ քաղաքացի է եւ հրաժարվել է Մեծ Բրիտանիայի քաղաքացիությունից: Հայաստանի 4-րդ նախագահի ընտրությանը մասնակցելուց հետո լրագրողների հետ զրույցում այս մասին հայտարարեց ԱԺ փոխխոսնակ, ՀՀԿ-ական Էդուարդ Շարմազանովը՝ հավելելով, որ Արմեն Սարգսյանն այդ փաստաթղթերի հիման վրա ավելացնելու որեւէ բան չունի:
«Եթե Արմեն Սարգսյանը ընտրվի, ես համոզված եմ, որ կընտրվի, լեգիտիմության որեւէ խնդիր չունի: Մնացածը տարբեր քաղաքական ուժերի՝ կոնկրետ մի ուժի մտահոգություն է: Եթե նույնիսկ իշխանությունը քայլի ծովի վրայով, կգտնվեն գործիչներ, ովքեր իշխանությանը կմեղադրեն լողալ չիմանալու մեջ»,- ասաց Շարմազանովը: Նրա խոսքով՝ կան գործիչներ, որոնք քննադատել են երեկ, քննադատում են այսօր եւ քննադատելու են վաղը՝ անկախ նրանից, թե ինչ են քննադատում եւ ինչ են քննադատում:
Հիշեցնենք, որ Արմեն Սարգսյանը ՀՀ նախագահի միակ թեկնածուն է, որին առաջադրել է իշխող կոալիցիան՝ ՀՀԿ-ն եւ ՀՅԴ-ն: «Ծառուկյան» խմբակցությունը ցանկություն չէր հայտնել թեկնածու առաջադրելու, իսկ «Ելք»-ը չուներ բավարար թվով պատգամավորներ՝ թեկնածու առաջադրելու համար:
