«Ամերիկացիների հակառակորդների դեմ պատժամիջոցների միջոցով հակազդելու» (CAATSA) օրենքը չխոչընդոտեց, այլ ընդհակառակը, ամրապնդեց ԱՄՆ եւ Եվրոպայի համագործակցությունը: Վաշինգթոնի ատլանտյան խորհրդի նիստում նման տեսակետ է հայտնել Պետդեպարտամենտի քաղաքական ծրագրավորման վարչության պետի առաջին տեղակալ Դեւվիդ Թեսլերը, հաղորդում է ՏԱՍՍ-ը:
«Անցյալ ամռանը մտավախություններ եղան, որ CAATSA-ն կարող է ազդել տրանսատլանտյան միասնության շրջանակներում մեր սերտ համաձայնության վրա: Կարծում եմ, որ ծանր աշխատանքի շնորհիվ, ապացուցեցինք, որ այդ վախերը անհիմն էին», - ասելէ նա: Դիվանագետը նշել է, որ շուտով նա արդեն հինգերորդ անգամ կմեկնի Եվրոպա այնտեղ պատժամիջոցների թեման քննարկելու համար:
Թեսլերը վստահեցրել է, որ եվրոպական երկրների հետ աշխատանքը շատ խիտ է եղել, հատկապես 2017 թվականի աշնանը, երբ Պետդեպարտամենտը հրապարակեց պաշտպանական եւ հետախուզական ոլորտների ռուսական ընկերությունների եւ ստորաբաժանումների ցանկը, որոնց հետ համագործակցությունը կարող է Վաշինգթոնի կողմից սահմանափակումների կիրառմանը հանգեցնել: «Մենք հաշվի ենք առել շատ բաներ», - ասել է նա:
ԱՄՆ նախագահ Դոնալդ Թրամփի կողմից ստորագրված օրենքը նախատեսում է ավելի խիստ պատժամիջոցներ Ռուսաստանի, Իրանի եւ ԿԺԴՀ դեմ եւ զգուշացնում է ամերիկյան եւ օտարերկրյա ընկերություններին պաշտպանական ոլորտում ռուսական ձեռնարկությունների եւ վարչությունների հետ համագործակցության կամ պայմանագրերի կնքման մասին:
