Արմավիր քաղաքի «Մանուշակ» մանկապարտեզում 3-ամյա երեխային պատանդ վերցնելու եւ նախկին կնոջն ու նրա տատիկին մարմնական վնասվածքներ հասցնելու մեջ մեղադրվող Արգամ Հովիկյանին չեն թուլատրել մասնակցել հոր թաղման արարողությանը։ Այս մասին NEWS.am-ի հետ զրույցում ասաց Արգամ Հովիկյանի պաշտպանը՝ Արսեն Սարգսյանը։
«Ես դիմում էի ներկայացրել, որ նրան թույլատրեն մասնակցել հոր թաղման արարողությանը, որն այսօր է, սակայն, ինձ մերժել են՝ պատճառաբանելով, որ իմ պաշտպանյալը մեղադրվում է առանձնապես ծան հանցագործություն կատարելու մեջ»,-ասաց նա։
Պաշտպանը հավելեց, որ նախաքննությունն արդեն ավարտին է մոտենում, մի քանի քննչական գործողություններ են մնացել, որից հետո գործը կուղարվի դատարան։
Նշենք, որ այս պահին Արգամ Հովիկյանը գտնվում է «Արմավիր» քրեակատարողական հիմնարկում:
Ավելի վաղ ոստիկանությունը հայտնել էր, որ 2017թ. հոկտեմբերի 30-ին, ժամը 16:25-ին ահազանգ է ստացվել, որ մի տղամարդ դանակով զինված ներխուժել է Արմավիր քաղաքի «Մանուշակ» մանկապարտեզ: Պարզվել է, որ այդ քաղաքացին Արգամ Հովիկյանն է, որը դանակի սպառնալիքով մանկապարտեզում պատանդ է պահել 3-ամյա երեխայի՝ պահանջելով հանդիպում իր նախկին կնոջ հետ:
Նրա հետ բանակցություններ են վարել իրավապահ մարմինների ներկայացուցիչները: Բանակցությունների ընթացքում ոստիկանության ծառայողներին հաջողվել է երեխային անվնաս հանել սենյակից:
Ձեռք բերված բավարար ապացույցների հիման վրա՝ քննիչը որոշում է կայացրել տղամարդուն մեղադրանք առաջադրել Քրեական օրենսգրքի 34-104-րդ հոդվածի 2-րդ մասի 1-ին կետով եւ 218-րդ հոդվածի 2-րդ մասի 3-րդ եւ 4-րդ կետերով: Նա կալանավորված է եւ գտնվում է «Դատապարտյալների հիվանդանոց» քրեակատարողական հիմնարկում:
Արգամ Հովիկյանը ցուցմունք է տվել եւ հայտնել, որ մանկապարտեզ էր գնացել կնոջ հետ վերջնական խոսելու եւ նրան տուն վերադարձնելու նպատակով, իսկ եթե չստացվի, նպատակ է ունեցել կնոջ աչքի առջեւ ինքնասպան լինել:
