Քաղաքացուն իր կամքին հակառակ նախընտրական քարոզչությամբ զբաղվել հարկադրելու համար անձինք, որոնք կկատարեն այս բռնի գործողությունը մեկ այլ անձի նկատմամբ, կարող են ենթարկվել վարչական եւ նույնիսկ քրեական պատասխանատվության: Այս մասին մարտի 15-ին ԱԺ պետաիրավական հարցերի եւ մարդու իրավունքների մշտական հանձնաժողովի նիստում Ընտրական օրենսգրքում փոփոխություններ եւ լրացումներ կատարելու մասին օրինագծի քննարկման ժամանակ ասաց արդարադատության առաջին փոխնախարար Արթուր Հովհաննիսյանը:
Նրա խոսքով՝ Քրեական օրենսգրքում նման հոդված չկա, եւ ՔՕ-ն քրեական պատասխանատվություն չի նախատեսում անձին իր կամքին հակառակ նախընտրական քարոզչության հարկադրելու համար: «Սակայն մենք կարծում ենք, որ տվյալ գործողությունը այնպիսի հանրային սպառնալիք է ներկայացնում, որ դրանով զբաղվող մարդը պետք է քրեական պատասխանատվության ենթարկվի»,- պարզաբանեց Հովհաննիսյանը:
Դրանից զատ, արդարադատության առաջին փոխնախարարը շեշտեց, որ այս օրինագծի քննարկման ժամանակ որոշվել է մի քանի լրացումներ կատարել: Մասնավորապես՝ իրավապահ մարմնների աշխատակիցների կողմից քաղաքացիներին քարոզչությամբ զբաղվելուն հարկադրելու դեպքեր բացահայտելիս, նրանք պետք է պատասխանատվության ենթարկվեն: