Մեծ Բրիտանիայի իշխանությունները Լոնդոնում ՌԴ դեսպանատանը հաղորդել են, որ նախկին ԳՀՎ գնդապետ Սերգեյ Սկրիպալը եւ նրա դուստր Յուլիան ծայրահեղ վիճակում են, բայց նրանք «թաքցնում են բժշկական եզրակացությունը»: Այս մասին հայտարարել է Լոնդոնում Ռուսաստանի դեսպան Ալեքսանդր Յակովենկոն, հաղորդում է ՌԲԿ-ն:
«Մենք հենց նոր Արտաքին գործերի նախարարության նոտան ստացանք այն մասին, որ Սկրիպալի ընտանիքը ծայրահեղ վիճակում է, բայց մեզ համար այս տեղեկատվությունը բավարար չէ: Բրիտանացիները դեռեւս մեզանից թաքցնում են բժշկական եզրակացությունը», - ասել է նա: Յակովենկոն շեշտել է, որ Մոսկվան տուժածներին տեսնելու եւ բժիշկների հետ խոսելու հնարավորություն չունի:
«Ոչ ոք անգամ այստեղ նկար չի հրապարակել: Ուստի, միգուցե նրանք ողջ են, միգուցե ոչ, իսկ հնարավոր է, ոչինչ էլ չի եղել: Այսինքն մեզ առաջարկում են բառերին հավատալ, ինչը բացարձակապես անընդունելի է», — ընդգծել է դեսպանը:
Լոնդոնը Մոսկվային է մեղադրում Սկրիպալի եւ նրա դստեր թունավորման մեջ: Նախօրեին Մեծ Բրիտանիայի վարչապետ Թերեզա Մեյը հայտարարել էր 23 ռուս դիվանագետների արտաքսման մասին եւ Ռուսաստանի դեմ մի շարք այլ միջոցառումների մասին: Մոսկվան կտրականապես ժխտում է բոլոր մեղադրանքները:
Մարտի 4-ին ԳՀՎ 66-ամյա նախկին գնդապետ Սերգեյ Սկրիպալը եւ նրա 33-ամյա դուստր Յուլիան ենթարկվել են անհայտ նյարդային գործակալի ազդեցության: Նրանց անգիտակից վիճակում գտել էին Սոլսբերիի The Maltings առեւտրի կենտրոնի նստարանին:
Երկուսն էլ այժմ ծայրահեղ վիճակում հիվանդանոցում են գտնվում: 2004-ին Սկրիպալը կալանավորվել էր Ռուսաստանի Դաշնային անվտանգության ծառայության կողմից, այնուհետեւ դատապարտվել 13 տարվա ազատազրկման` պետական դավաճանության համար՝ զրկելով բոլոր կոչումներից եւ մրցանակներից: 2010-ին լրտեսության մեղադրանքով ձերբակալված անձանց փոխանակման շրջանակներում նա փոխանցվեց ԱՄՆ-ին: Նույն թվականին նախկին ԳՀՎ գնդապետը Մեծ Բրիտանիա տեղափոխվեց:
Սկրիպալին թունավորելու որոշումն, ավելի շուտ, Պուտինն է ընդունել. Բրիտանիայի ԱԳՆ
Լավրովը մեկնաբանել է «Սկրիպալի գործով» ՌԴ-ի հետ համագործակցելու Բրիտանիայի մերժումը
Ռուսաստանը պատասխանատու է նախկին ռուսական լրտեսի թունավորման համար. Թերեզա Մեյ
