«Սասնա ծռերին» աջակցելու մեջ մեղադրվող Կարո Եղնուկյանին մեղադրում են անհեթեթ արարքների մեջ, որոնք ոչ մի տրամաբանության մեջ չեն տեղավորվում: Այս մասին, այսօր՝ մարտի 19-ին, լրագրողների հետ հանդիպման ժամանակ նշել է նրա փաստաբան Տիգրան Հայրապետյանը:
Նրա խոսքով, մասնավորապես, Եղնուկյանին մեղադրում են, որ նա Մաքսիմ Սարգսյանի միջոցով ապահովել է, որ քաղաքացիները Ազատության հրապարակից գնան ու հանրահավաք անեն Խորենացի փողոցում. «Նախ անհասկանալի է, թե ինչ է նշանակում ապահովել է: Մյուս կողմից ենթադրվում է, որ Մաքսիմ Սարգսյանը տեղափոխել է մարդկանց, բայց նրա հետ ոչ մի հարց չկա, իսկ Եղնուկյանին քրեական պատասխանատվության են ենթարկում:
Կամ ասում են՝ Եղնուկյանը իր հեռախոսը փոխանցել է X քաղաքացուն, որը տեղեկություններ է հայտնել Վարուժան Ավետիսյանի ռադիոկապի մասին: Այդ X քաղաքացուն մեղադրանք չեն առաջադրել, իսկ Եղնուկյանը, որ հեռախոս է փոխանցել, մեղադրանք են առաջադրել: Իրականում այդ քաղաքացին ոչինչ էլ չի փոխանցել, միայն Վարուժան Ավետիսյանին ասել է՝ ձեր ռադիոկապը ինչ ռադիոկապ է, նա էլ պատասխանել է: Հաջորդ դրվագով Եղնուկյանը նպաստել է, որ ինչ-որ մարդիկ տեղեկություններ տարածեն, որ իրենց տրամադրած սնունդից «Սասնա ծռերը» թունավորվել են: Այս անհեթեթ մեղադրանքներով Եղնուկյանը պահվում է կալանքի տակ:
«Եղնուկյանին ասում են, որ նա օժանդակել է Վարուժան Ավետիսյանին՝ պատանդներ պահելու հարցում: Բայց Վարուժան Ավետիսյանին չեն մեղադրում, որ նա ոստիկան պատանդներ է պահել, բայց Եղնուկյանին մեղադրում են օժանդակելու մեջ, սա էլ է անհեթեթ: Այստեղ չկա ոչ մի տրամաբանություն ու իրավաբանություն»,- ասաց պաշտպանը:
Նա միտում է տեսնում, որ Կարո Եղնուկյանի գործը միացրել են «Սասնա ծռերի գործին: «Սա արել են, որ Եղնուկյանը տարիներով մնա անզատության մեջ: Սա վկայում է, որ Եղնուկյանը քաղաքական բանտարկյալ է: Այս ընթացքում Եղնուկյանը պարապ չի մնացել, թարգմանել է ԵԽ բանաձեւը, թե ում պետք է համարել քաղբանտարկյալ: Ըստ այդ բանաձեւի 5 չափորոշիչներ կան, եւ Եղնուկյանը բոլոր 5 չափանիշներով համընկնում է որպես քաղբանտարկյալ»,-ասաց Տիգրան Հայրապետյանը:
Հարցին, թե այդ դեպքում՝ որն է պատճառը, որ իշխանությունները հետապնդում են Կարո Եղնուկյանին, փաստաբանը պատասխանեց. «Եղնուկյանը հայտարարել է, որ սա անմիջականորեն կապված է իր ընտանիքի նկատմամբ ՀՀ նախագահի վերաբերմունքով: Նա ընդգծված վերաբերմունք ունի իր եւ եղբոր նկատմամբ, որովհետեւ միջադեպ է տեղի ունեցել Նյու Յորքում համալսարաններից մեկում իր եւ նախագահի միջեւ»:
Նշենք, որ դատավոր Արտուշ Գաբրիելյանը քննում է «Սասնա ծռեր» խմբի անդամներ Արմեն Լամբարյանի, Աշոտ Պետրոսյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Մանվել Աթոյանի, Վարդգես Գեւորգյանի, Կարո Եղնուկյանի և Խաչատուր Գիչյանի առանձնացված մասով գործը: Նրանցից Կարո Եղնուկյանն ու Խաչատուր Գիչյանն են միայն, որ չեն եղել ՊՊԾ գնդում, նրանց գործը միացվել է «Սասնա ծռերի» գործին:
