Տավուշի մարզի պաշտպանական դիրքերից մեկում ժամկետային զինծառայող է հրազենային վիրավորում ստացել: Դեպքը տեղի է ունեցել նախօրեին: Զինվորը տեղափոխվել է Երեւան՝ կենտրոնական զինհոսպիտալ: Պաշտպանության նախարարի մամուլի խոսնակի տեղեկացմամբ՝ վիրավորի վիճակը կայուն է, նրա կյանքին վտանգ չի սպառնում: Արծրուն Հովհաննիսյանը, սակայն, դեպքի մասին մանրամասներ չի հաղորդել:
Արցախում հակառակորդի անօդաչու է խոցվել: Պաշտպանության բանակի դիրքապահներն ադրբեջանական անօդաչու թռչող սարքը խոցել են արցախա-ադրբեջանական հակամարտ զորքերի շփման գծի հյուսիս-արեւելյան՝ Թալիշի հատվածում: Արցախի պաշտպանության նախարարության մամուլի ծառայության փոխանցմամբ՝ հակառակորդը սարքը գործողության մեջ էր դրել հետախուզական նպատակներով:
Ռուսաստանի Վորոնեժի մարզում այսօր հայկական ավտոբուսի մասնակցությամբ խոշոր վթար է տեղի ունեցել: Երեւան-Մոսկվա երթուղին իրականացնող հայկական համարանիշերով Mercedes մակնիշի ավտոբուսը դուրս է եկել ճանապարհի հանդիպակաց գոտի եւ բախվել մի բեռնատարի: Պատահարի հետեւանքով 2 մարդ զոհվել է, 8 տուժած տարբեր աստիճանի վնասվածքներով տեղափոխվել է Պավլովսկի հիվանդանոց:
Ավտոբուսում 50 մարդ է եղել՝ 48 ուղեւոր եւ 2 վարորդ: Նախապես հաղորդվում էր, որ վարորդներից մեկը զոհերի թվում է, սակայն ավելի ուշ արտակարգ իրավիճակների նախարարությունը պաշտոնական տվյալներ հրապարակեց. զոհվել են ավտոբուսի ուղեւորներից 40-ամյա Ա.Սուքիասյանը եւ բեռնատարի վարորդը՝ Ն.Սիոնին: Տուժածներից 4-ի վիճակը բժիշկները ծանր են գնահատում:
Նշենք, որ Երեւան-Մոսկվա երթուղու ավտոբուսը պատկանում է Երեւանում գրանցված «ՄԱՆ-ՏՈՒՐ» ընկերությանը: Պատահարի մասին որեւէ տեղեկություն ընկերությունից ճշտել չհաջողվեց. գրասենյակը կեսօրից հետո փակ էր, հեռախոսազանգերին նույնպես չէին պատասխանում:
Ժիրայր Սեֆիլյանը դատապարտվեց 10.5 տարվա ազատազրկման: Դատավոր Տաթեւիկ Գրիգորյանն այսօր հրապարակել է նաեւ գործով մյուս ամբաստանյալների դատավճիռը: Դրա համաձայն՝ Գեւորգ Սաֆարյանը դատապարտվել է 4 տարվա ազատազրկման. դրան գումարվել է առաջին դատավճռի 2 տարի ժամկետը եւ վերջնական պատիժ է սահմանվել 5 տարի 6 ամիս ազատազրկում: Գործով Ներսես Պողոսյանն ու Սասունիկ Կիրակոսյանը դատապարտվել են 3 տարի 6 ամիս, Գալուստ Գրիգորյանն ու Հրայր Թոփչյանը՝ 3, Հովհաննես Պետրոսյանը՝ 2 տարի ժամկետով ազատազրկման:
Գործով պաշտպաններից Արայիկ Պապիկյանը դատավճիռը քաղաքական պատվեր է որակում: Պաշտպանը պատրաստվում է վճիռը բողոքարկել Վերաքննիչ դատարանում, բայց այս ատյանից նույնպես, իր խոսքով, արդար դատավճռի ակնկալիք չունի: Իսկ ամբաստանյալների աջակիցները դատավճռի հրապարակումից հետո էլ երկար ժամանակ չէին հեռանում դատարանից: Լարված իրավիճակ էր ե՛ւ շենքի ներսում, ե՛ւ դրսում. այստեղ ոստիկանությունը մեծաթիվ ուժեր էր կենտրոնացրել: Մեղադրող Պետրոս Պետրոսյանին էլ հավաքվածներն ամոթանքի խոսքերով են ճանապարհել: Մեղադրողը ոստիկանների ուղեկցությամբ է հասել մեքենային ու հեռացել:
Նախագահ Սերժ Սարգսյանը երեկ վերջապես հետեւեց կուսակիցների օրինակին եւ չբացառեց վարչապետի պաշտոնը զբաղեցնելու հավանականությունը: Լրատվամիջոցներից մեկին տված հարցազրույցում նախագահը նշել էր, որ եթե կոալիցիոն կուսակցությունները քննարկումների արդյունքում որոշեն վարչապետի պաշտոնում առաջադրել իր թեկնածությունը, կհամաձայնի: Հարցն այսօր ակտիվորեն քննարկվել է խորհրդարանում: Նիկոլ Փաշինյանն ասում է՝ այսպիսով Սերժ Սարգսյանը վերջ դրեց ինտրիգներին եւ հայտարարեց ստահոդ պետություն ստեղծելու մասին:
Իսկ կոալիցիոն կուսակցությունները շարունակում են պնդել, որ եզրափակիչ քննարկումներ չեն եղել, վերջնական որոշմանն էլ դեռ պետք է սպասել: Էդուարդ Շարմազանովը հայտարարել է՝ Սերժ Սարգսյանը չի կարող անձնական հավակնություններով առաջնորդվել, ինչի մասին էլ հայտարարել է: Իսկ նախագահի 2014 թվականի հայտարարության մասին հարցը հունից հանել է Շարմազանովին: Դաշնակցությունում նույնպես կարծում են, որ պետական կառավարման ոլորտում մեծ փորձ ունեցող Սերժ Սարգսյանն օգտակար կլինի պետության համար: Իսկ նրան բոլոր, այդ թվում՝ կուսակցության նախագահի պաշտոնից հեռացնելու մասին հայտարարություններն Արմեն Ռուստամյանն անընդունելի ծայրահեղություն է համարում:
Եթե Սերժ Սարգսյանն առաջադրվի վարչապետի պաշտոնում, «Ելք»-ը փողոց դուրս կգա: Դաշինքի կուսակցությունները պայքարի տարբեր ծրագրեր ունեն, բայց բոլոր երեք ուժերի գործողությունների ծրագրում էլ փողոցային պայքար նախատեսվում է: Գոնե մեկ հարցում դաշինքում կոնսենսուս կա: Էդմոն Մարուքյանն ընդունում է, որ պայքարի հարցում տարաձայնություններ կան, բայց դա չի նշանակում, որ «Ելք»-ը պառակտվում է:
Եվ վերջում «Ծառուկյան» դաշինքի պատգամավորի հետ կապված սկանդալի մասին: Գեւորգ Պետրոսյանի ուսանողներից Արման Գալջյանը պնդում է, որ պատգամավոր-դասախոսն իրեն սպառնալից տոնով նկատողություն է արել՝ «կտամ չանդ կծռեմ»: Պատճառը, ուսանողի խոսքով, այն է, որ չսափրված է համալսարան ներկայացել: Գեւորգ Պետրոսյանը վստահեցնում է, որ ուսանողը ներողություն է խնդրել իրենից, իրավիճակը հարթվել է, եւ տարակուսում է, որ միջադեպը նման աղմուկ է բարձրացրել:
Հայաստանի առաջատար հեծանվորդ Էդգար Ստեփանյանն ԱՄՆ է փոխադրվել, առայժմ՝ 6 ամսով: Մարզիկը պայմանագիր է կնքել Velo Pasadena ակումբի հետ: Նա, սակայն, 2020 թվականին Տոկիոյում կայանալիք Օլիմպիական խաղերի ուղեգրի համար կշարունակի պայքարը Հայաստանի հավաքականի կազմում: Մեր թղթակցի հետ զրույցում Էդգարը խոստովանել է, որ իր կարիերայում սա մեծ հնարավորություն է. ամեն շաբաթ մրցումներ կան, մեծ փորձ կարող է ձեռք բերել: Նշենք, որ Velo Pasadena ընկերության սեփականատերն ազգությամբ հայ է՝ Հրաչ Գեւրիկյանը: Հենց նա էլ հրավիրել է Էդգար Ստեփանյանին: Հեծանվորդն արդեն այսօրվանից սկսել է մարզումներն ամերիկյան ակումբում:
Մարտի 20-ին դոլարը եւ ռուբլին աննշան էժանացել են, իսկ եվրոն նորից ամրապնդում է դիրքերը: Դոլարի փոխարժեքը կազմել է 480 դրամ, եվրոյինը՝ 591, ռուբլունը՝ 8 դրամ 30 լումա, ֆունտինը՝ 673 դրամ:
Մարտի 21-ի գիշերը հանրապետությունում սպասվում է առանց տեղումների եղանակ, իսկ ցերեկը շրջանների զգալի մասում հնարավոր է կարճատեւ անձրեւ: Օդի ջերմաստիճանն էապես չի փոխվի: Երեւանում նույնպես վաղը ցերեկը հնարավոր է անձրեւ եւ ամպրոպ: Մայրաքաղաքում գիշերը կդիտվի +8+10, ցերեկը՝ +21+23 աստիճան տաքություն: