Ռուսաստանի Դաշնության Պետական դումայի՝ Թաթարստանից պատգամավոր Ֆաթիհ Սիբագատուլինի հայտարարությունն այն մասին, որ լրագրողներն ընդամենը ծառաներ են, ցուցադրում է ռուսական իշխանությունների իրական վերաբերմունքը լրագրողի մասնագիտության նկատմամբ: Այս մասին NEWS.am- ի թղթակցի հետ զրույցում ասաց Ռուսաստանում ԶԼՄ-ների իրավունքների պաշտպանության կենտրոնի նախագահ Գալինա Արապովան:
Նրա խոսքով՝ Լիբերալ-Դեմոկրատական կուսակցության պատգամավոր, ՌԴ Պետդումայի միջազգային հարցերով կոմիտեի ղեկավար Լեոնիդ Սլուցկիի շուրջ վերջերս ծագած սկանդալը բավականին տիպական է: «Ես չեմ կարող ասել, թե որքան վաղուց է սկսվել Սլուցկիի ոչ բարոյական վարքագծի, նրա կողմից ոտնձգությունների հետ կապված այս պատմությունը եւ ինչու են լրագրողները մինչ այժմ լռել: Ոմանք գրում են, որ համբերությունը սահման ունի: Հավանաբար, այդ սահմանը հատվել է», - նշեց Արապովան:
Միեւնույն ժամանակ, իրավապաշտպանը շեշտեց, որ լրագրողներին կարող է ուղղակի հոգնեցնել այդ նվաստացված դիրքը, երբ նրանց որպես ծառաների են վերաբերվում, եւ մի շարք ռուսաստանյան ԶԼՄ-ների ներկայացուցիչների կոշտ դիրքորոշումը, որոնք աջակցել են իրենց գործընկերներին, կարել է միայն ողջունել: «Անկախ նրանից, թե որպես ինչ եք աշխատում, եթե ձեզ անհարգալից կերպե ն վերաբերվում, ապա սեփական պատիվը, բարի համբավը պաշտպանելու նորմալ, մարդկային ցանկություն է առաջանում», - ասաց իրավապաշտպանը:
Միեւնույն ժամանակ, Գալինա Արպովան նշեց, որ Պետդումայի՝ Թաթարստանից պատգամավորի հայտարարությունը վառ կերպով ցուցադրում է Ռուսաստանի բազմաթիվ պաշտոնյաների վերաբերմունքը լրագրողների նկատմամբ, որը ձեւավորվել է վերջին տարիների ընթացքում: Ռուս իրավապաշտպանը նաեւ ընդգծեց, որ դա բավականին մեծ խնդիր է: Նա գտնում է, որ մի շարք ռուսաստանյան ԶԼՄ-ների նման դիրքորոշումը բավական լուրջ բողոքի ձայն է վերջին մի քանի տարիների ընթացքում եւ նույնիսկ՝ գրեթե միակը: «Պաշտոնատար անձինք սովոր են, որ իրենց վերաբերյալ միայն գովասանական հոդվածներ են գրում: Նրանք հետ են սովորե առողջ քննադատությունից», - դժգոհել է իրավապաշտպանը:
