Հայաստանի կառավարությունը մարտի 29-ի նիստին բացասական եզրակացություն է տվել «Ֆոտո եւ վիդեո նկարահանման միջոցով հայտնաբերված երթեւեկության կանոնների խախտման դեպքերում վարչական վարույթի առանձնահատկությունների մասին» ՀՀ օրենքում փոփոխություններ կատարելու մասին» օրինագծի վերաբերյալ: Որոշման նախագիծը ներկայացրել է ՀՀ արդարադատության նախարար Դավիթ Հարությունյանը:
Ըստ նրա՝ այս օրինագծում առաջարկվում է հանել տրանսպորտային միջոցների վարձակալում տրամադրող իրավաբանական անձանց եւ անհատ ձեռնարկատերերի պատասխանատվությունը վարձակալողների կողմից երթեւեկության կանոնների խախտումների համար: «Կառավարությունն առաջարկում է ձեռնպահ մնալ այս օրինագծի ընդունումից, քանի որ Վարչական իրավախախտումների նոր օրենսգիրքը արդեն իսկ նախատեսել է Ֆոտո եւ վիդեո նկարահանման միջոցով հայտնաբերված երթեւեկության կանոնների խախտման հետ կապված գործերի վարչական վարույթի առանձնահատկությունները»,- նշել է նախարարը:
Նա պարզաբանել է, որ, Վարչական իրավախախտումների վերաբերյալ ՀՀ օրենսգրքի 138-րդ հոդվածի 7-րդ մասի համաձայն, տրանսպորտային միջոցի սեփականատերն է պատասխանատվություն կրում վարչական իրավախախտման համար, եւ եթե մեքենան պատկանում է իրավաբանական անձի կամ անհատ ձեռնարկատիրոջ, ապա պատասխանատվությունը նրանցն է, եթե այլ անձի մեղքը ապացուցված չէ:
Հարությունյանը նշել է, որ օրենսգիրքը կներկայացվի խորհրդարան կառավարության կողմից հաստատվելուց հետո: Բացի այդ, մի շարք այլ օրինագծեր եւս «Ֆոտո եւ վիդեո նկարահանման միջոցով հայտնաբերված երթեւեկության կանոնների խախտման դեպքերում վարչական վարույթի առանձնահատկությունների մասին» ՀՀ օրենքի չեղարկում են նախատեսում:
Օրինագծի հեղինակներն են «Ծառուկյան» դաշինքի պատգամավորներ Տիգրան Ուրիխանյանը, Միքայել Մելքումյանը եւ Վահե Էնֆիաջյանը:
