Արմավիրի մարզի Փարաքար համայնքի հիմնական դպրոցի շենքը, հարակից կառույցները եւ սպասարկող տարածքը, որը գտնվում է Պետական գույքի կառավարման վարչության հաշվեկշռում, նվիրվել է գյուղին տեղեկատվական տեխնոլոգիաների կենտրոն կառուցելու նպատակով։ Որոշման նախագիծը հավանության է արժանացել կառավարության մարտի 29-ի նիստում։ Այն ներկայացրել է Պետական գույքի կառավարման վարչության պետ Արման Սահակյանը։
Նրա խոսքով, շենքը զբաղեցնում է 968.2 քառակուսի մետր տարածք, որից 87,8 քառակուսի մետր՝ կաթսայատունը, 20.2 քառակուսի մետր՝ պահեստը, 0.43 քառակուսի մետր էլ սպասարկող տարածքները, որոնց ընդհանուր արժեքը գնահատվել է 41.5 մլն դրամ։ «Փարաքար համայնքը պարտավորվում է 3 տարում իրականացնել 50 մլն դրամի ներդրում հետեւյալ համամասնությամբ. 2018-ին՝ 25 մլն դրամ, 2019-ին՝ 15 մլն, իսկ 2020-ին՝ 10 մլն դրամ»,–նշել է Սահակյանը։
Նախատեսվում է համայնքում զարգացնել ՏՏ ոլորտը, ինչպես նաեւ պատրաստել ոսկերիչներ։ Ծրագրվում է ստեղծել մոտ 50 նոր աշխատատեղ: