Ադրբեջանի պաշտպանության նախարարությունը հերքել է մի շարք լրատվամիջոցների հրապարակումները Ռուսաստանից սպառազինության մատակարարումների հետ կապված Ադրբեջանի մեծ դժգոհության մասին:
Ինչպես հայտնում է haqqin.az-ը, մասնավորապես՝ նշվում էր այն մասին, որ Բաքուն իբր խոտանել է ԲՏՌ82Ա-ի, Տ90Ս տանկերի, ԲՆՊ3-ի, «Սմերչի» հրթիռների եւ ԲՏՌ82Ա-ի գնդացիրի զինամթերքի խմբաքանակները:
«Պաշտոնապես հայտարարում ենք, որ նման հրապարակումները իականությանը չեն համապատասխանում եւ սադրիչ բնույթ ունեն: Ադրբեջանը հատուկ ուշադրություն է դարձնում որոշակի արտադրող երկրներից սպառազինության տարբեր տեսակների գնումներին եւ ձեռքբերմանը: Մենք մանրակրկտորեն ընտրում ենք լավագույն, առավել որակյալ եւ արդյունավետ ռազմական արտադրանքը, որն անհրաժեշտ է մեր մարտական պոտենցիալի մեծացման համար՝ օկուպացված տարածքներն ազատագրելու համար»,- նշված է Ադրբեջանի ՊՆ հայտարարության մեջ:
Նշվում է նաեւ, որ ադրբեջանական բանակի սպառազինություն ընդունած ռուսական նոր սպառազինությունը համապատասխանում է բարձր պահանջներին, որոնք ներկայացված են սպառազինության ժամանակակից համակարգերին, ինչպես նաեւ զգալիորեն մեծացնում է ստորաբաժանումների մանեւրայնությունն ու կրակային հնարավորությունները, հատկապես այն ստորաբաժանումների, որոնք զորքերի պաշտպանական առաջնագծում ռազմական խնդիրներ են կատարում
Հիշեցնենք, որ ավելի վաղ haqqin.az-ը հայտնել էր բելառուսական լրատվամիջոցների հրապարակումների շարքի մասին Ռուսաստանի մատակարարած տեխնիկայից Ադրբեջանի դժգոհության մասին: