Գանձախույզերի կողմից կողոպտման եւ ավիրման ենթարկվող` Վանի ներկայիս Մուրադիյե գավառում գտնվող պատմական Սուրբ Ստեփանոս հայկական եկեղեցու պատերը քանդված են, իսկ ներսում մեծ խորությամբ փոսեր են բացված:
Ինչպես տեղեկանում ենք Akunq.net–ից, 1915 թ. Հայոց ցեղասպանությունից առաջ ակտիվ կերպով հայ համայնքին ծառայած Սուրբ Ստեփանոս եկեղեցին նաեւ նշանավոր ուխտավայր է եղել:
Հայկական միջնադարյան ճարտարապետության աննման նմուշներից մեկը եղող սույն եկեղեցու մոտակայքում գտնվող գերեզմանատան քարերը եւս ավերվել են գանձագողերի կողմից, իսկ եկեղեցու այն հատվածները, որոնք կարողացել են դիմակայել այդ ավերածություններին, վերջնականապես քանդվելու սպառնալիքի տակ են:
Ժամանակին եկեղեցու մոտակայքում բնակություն հաստատած Էբուբեքիր Չիֆթչին հայտնելով, որ մինչեւ 1970 թ. կառույցը լիովին կանգուն է եղել, նաեւ հետեւյալ տեղեկություններն է հաղորդում. «Եկեղեցու շրջակայքը եւ դռները կանգուն էին: Ես ինքս եմ տեսել քահանաների մենախցերը, որոնք եւս չէին ավերվել: Մեր մարդիկ այս հարցում խիստ անզգա են: Մի քանի հոգի այս կառույցը պեղել է` գանձ գտնելու հույսով: Նման դեպքերը իրոք շատ ցավալի են. գանձախույզերը շատ վատ վիճակի են հասցրել եկեղեցին: Մենք ցանկանում ենք, որ պետությունը եկեղեցին վերականգնելով` վերադարձնի նրա նախկին տեսքը»:
Չիֆթչին նաեւ նշում է, թե չնայած ավերումներին` եկեղեցին շարունակում է գրավել տեղացի եւ օտարերկրացի զբոսաշրջիկների ուշադրությունը: