Ամերիկյան դերասան, գործարար եւ Քալիֆորնիա նահանգի նախկին նահանգապետ Առնոլդ Շվարցենեգերը սրտի վիրահատությունից հետո դուրս է գրվել հիվանդանոցից։ Այս մասին հաղորդել է նրա ներկայացուցիչ Դենիել Քետչելը իր թվիթերյան էջում, փոխանցում է ՌԲԿ–ն։ Ավելի վաղ դերասանը շնորհակալություն էր հայտնել բժիշկներին, որոնք իրեն վիրահատել էին։
TMZ–ի փոխանցմամբ՝ մարտի 30-ին Առնոլդ Շվարցենեգերին սրտի անհետաձգելի վիրահատություն էին կատարել։
Ըստ աղբյուրի՝ 70-ամյա դերասանին տեղափոխել էին Լոս Անջելեսի Սեդարս Սինայ բժշկակակն կենտրոն՝ կաթետերային փականի փոխարինման համար:
Սակայն բժիշկները որոշակի բարդությունների հետ էին բախվել եւ ստիպված էին եղել վիրահատել դերասանին:
Նշվում է, որ միջամտությունը կատարվել է բաց սրտի վրա եւ մի քանի ժամ է տեւել: Սա նրա առաջին վիրահատությունը չէ: 1997-ին փոխել են նրա աորտայի փականը:
Դենիել Քետչելի խոսքով՝ արթնանալուց հետո դերասանի առաջին խոսքերն են եղել «Տերմինատոր 2»–ից «I'm back» (Ես վերադարձել եմ) մեջբերումը։