ԱՄՆ իշխանությունների վերջին հայտարարությունները զուրկ են իմաստության եւ ռացիոնալության տարրական սկզբունքներից, իսկ քիմիական նյութերի ենթադրյալ կիրառման մասին պնդումները առիթ են Սիրիայի վրա հարձակվելու համար: Այս մասին հայտնում է «ՍԱՆԱ» Սիրիայի պետական լրատվական գործակալությունը՝ վկայակոչելով Սիրիայի Արաբական Հանրապետության արտաքին գործերի նախարարության աղբյուրը:
Աղբյուրը ընդգծել է, որ նման սրումը Դամասկոսին չի զարմացնում, քանի որ ԱՄՆ-ն եղել եւ մնում է ահաբեկչության հովանավորը Սիրիայում: Նրա խոսքով՝ ոչ ոքին չի զարմացնի այն, որ Վաշինգտոնը, որն իր օդային ուժերը տրամադրել էր «Իսլամական պետությանն» աջակցելու համար, այժմ աջակցում է ահաբեկիչներին Արեւելյան Գուտայում եւ օգտագործում է նրանց զրպարտությունն ու կեղծ տեղեկությունները՝ որպես առիթ Սիրիայի դեմ ագրեսիայի համար:
«Միացյալ Նահանգները եւ նրա դաշնակիցներ Ֆրանսիան եւ Մեծ Բրիտանիան սխալվում են, եթե կարծում են, որ իրենց հայտարարություններն ու գործողությունները կդադարեցնեն ահաբեկչության դեմ պայքարը Սիրիայում: Սիրիական պետությունը կշարունակի պայքարել ավազակային կազմավորումների դեմ՝ չնայած նրանց արձագանքին: Սիրիան ողջունում է ցանկացած անաչառ, ոչ քաղաքականացված եւ որոշ երկրների շահերին չծառայող հետաքննչական հանձնաժողովի, ինչը ապացուցում է իր անմեղությունը քիմիական նյութերի օգտագործման հարցում»,- նշել է նա: