Կառավարության նիստում երեք ներդրումային ծրագրեր են հավանության արժանացել: Այս մասին, այսօր՝ ապրիլի 12-ին, Կառավարության նիստից հետո տեղի ունեցած ճեպազրույցում նշել է Տնտեսական զարգացման և ներդրումների նախարարի պաշտոնակատար Սուրեն Կարայանը:
Նրա խոսքով, ընդհանուր առմամբ, 21,5 մլրդ դրամի ներդրում է նախատեսում եւ 475 նոր աշխատատեղերի ստեղծում. «Այս ներդրումներներից մեկը գինու եւ կոնյակի արտադրության ոլորտում է, մյուս երկուսը՝ թեթեւ արդյունաբերության ոլորտում: Թեթեւ արդյունաբերության ոլորտում ներդրումներն արվելու են Արտաշատ համայնքում եւ երկուսն էլ նոր ուղղություններ են Հայաստանում, որոնք մինչ այդ չեն եղել»:
Նախարարը տեղեկացրեց, որ իրենք բավականաչափ պարզեցրել են ներդրումային ծրագրերի քննարկման աշխատակարգերը, ինչպես նաեւ ժամկետները, որի արդյունքում գրեթե 3 անգամ ավելացել են այն հայտերը, որոնք մասնավոր հատվածը ներկայացնում է, որ օգտվի պետության կողմից տրամադրվող գործիքակազմից:
«Շատ կարեւոր է, որ այդ ներդրումային ծրագրերը իրենց մեջ ներառում են ե'ւ օտարերկրյա, ե'ւ տեղական ներդրումներ: Այսինքն ակնհայտ է, որ կա տնտեսական աշխուժացում եւ հույս ունենք, որ հետագա քայլերը եւս կնպաստեն, որ այս աշխուժացումը Հայաստանում կշարունակվի»,-ընդգծեց Կարայանը:
Բացի այդ, ըստ նախարարի, եւս երկու հարց է ընդունվել կառավարությունում որոնք վերաբերում են մշակված եւ չմշակված ադամանդների լիցենզավորումը ծանուցման եղանակով փոխանակելու ավարտական փուլին, ինչպես նաեւ զբոսաշրջության ոլորտում վիճակագրության նոր համակարգ են առաջարկել:
«Այդ համակարգով մենք ավելի մեծ հնարավորություններ կունենանք ավելի հասցեական, տարիքային եւ այլ չափանիշների հիման վրա հաշվառել ՀՀ այցելած զբոսաշրջիկներին»,-իր խոսքն ամփոփեց նախարարը: