![](img/news/04/46/50/default.jpg)
«Բարգավաճ Հայաստան» կուսակցությունը հերքում է իշխող կուսակցությունից դուրս գալու մասին լուրերը, սակայն միաժամանակ չի կոնկրետացնում որոշ հարցերի հանդեպ իր դիրքորոշումը, ինչից էլ Հանրապետական կուսակցությունը անում է իր հետեւությունները։ Մամուլի ասուլիսի ժամանակ նման բազմանշանակ հայտարարությամբ հանդես եկավ ՀՀԿ փոխնախագահ, պատգամավոր Ռազմիկ Զոհրաբյանը։
Խոսելով Հանրապետական եւ «Բարգավաճ Հայաստան» կուսակցությունների տարբերությունների մասին՝ Զոհրաբյանն ընդգծեց, որ ՀՀԿ-ն իր առանձին կուսակցական գիծը չի տանում, այլ հետեւում է համապետական քաղաքականությանը։ «Մենք պետական քաղաքականություն ենք վարելու նույնիսկ այն ժամանակ, երբ գտնվենք ընդդիմադիր շարքերում, քանի որ մենք պետականամետ քաղաքական ուժ ենք»,- խոստացավ Զոհրաբյանը՝ ընդգծելով, որ ի տարբերություն ՀՀԿ-ի՝ «Բարգավաճ Հայաստանը» հետեւում է սեփական քաղաքական կուրսին։ «Օրինակ, ԲՀԿ-ն ասում է, որ իրենց համար առաջնային են Եվրոպայի, հետո միայն՝ Ռուսաստանի հետ կապերը, իսկ ՀՀԿ-ն ասում է, որ առավել կարեւոր է Ռուսաստանի, նոր միայն Եվրոպայի հետ համագործակցությունը։ Կարծում եմ, սա ավելի շուտ բառախաղ է»,- հավաստիացրեց Զոհրաբյանը։
Նա ընդգծեց, որ քաղաքական ուժերը, որոնք նպատակ ունեն մեծամասնության հասնել առաջիկա ընտրություններում, արդեն իսկ սկսել են նախընտրական քարոզչությունը։ «ՀՀԿ-ն եւս ակտիվացնում է իր գործունեությունը»,- ասաց նա՝ միաժամանակ ավելացնելով, որ ՀՀԿ-ն ամեն դեպքում առաջինն է լինելու։
Խոսելով երկրի առջեւ ծառացած խնդիրների մասին՝ Զոհրաբյանն ընդգծեց, որ կառավարությունը պետք է անի հնարավոր ամեն բան, որպեսզի զսպի գնաճը։ «Կառավարությունն այդպիսի ծրագիր ունի եւ այս տարի անպայման կիրականացնի այն»,- ասաց պատգամավորը։