Վարչապետի պաշտոնում Սերժ Սարգսյանի ընտրվելը ոստիկաններով շրջափակված ԱԺ–ում նորմալ քաղաքական գործընթաց է, որը հարիր է աշխարհի շատ երկրներին, իսկ ոստիկանները փողոց են դուրս եկել ցուցարարների անվտանգությունն ապահովելու համար։ Այս մասին այսօր՝ ապրիլի 17–ին՝ լրագրողների հետ զրույցում հայտնեց ԱԺ–ում ՀՀԿ խմբակցության ղեկավար Վահրամ Բաղդասարյանը։
Անդրադառնալով փողոցներում ընթացող բողոքի ցույցերին՝ նա նշեց, որ պետական շենքերի շրջափակումն անընդունելի է։ «Ուրիշ բան է երթեր, ցույցեր անելը, բայց բողոքները պետք է լինեն հիմնավորված։ Անընդունելի է նաեւ հեղափոխությունը, որի հիմքը ես չեմ տեսնում։ Հեղափոխություն կարող են անել 2022 թվականին Սահմանադրությամբ»,–հավելեց նա։
Իսկ ոստիկանների գործելաոճի մասին Վահրամ Բաղդասարյանը կարծիք հայտնեց, որ նման համբերատարություն աշխարհում ոչ մի ոստիկանի մոտ չի նկատվել։
Այսօր` ապրիլի 17-ի վաղ առավոտյան Մաշտոցի պողոտա-Թումանյան փողոց, ինչպես նաեւ Հերացի-Կորյուն փողոցների խաչմերուկների մոտից ոստիկանները բերման են ենթարկել մի խումբ ցուցարարների: Ոստիկանության տվյալներով՝ բերման ենթարկվածների թիվը 59-ն է:
Իսկ նախօրեին Բաղրամյան պողոտայում բախում է տեղի ունեցել ցուցարարների եւ ոստիկանների միջեւ: Ոստիկանությունը լուսաձայնային նռնակներ է կիրառել ցուցարարների դեմ: Բախումների հետեւանքով 46 անձ, այդ թվում Նիկոլ Փաշինյանը, տեղափոխվել են հիվանդանոց: Այսօր կրկին Փաշինյանն ու կողմնակիցները փակել են Երեւանի կենտրոնական մի քանի փողոցներ, արգելափակել որոշ պետական շենքերի մուտքեր: