«Տարոն դուրս արի». Ցուցարարները փակել են քաղաքապետարանի մուտքը (Ֆոտո)

Ֆրանսիայի հրապարակում գտնվողներին կոչ եմ անում մեզ միանալ, այնտեղ սադրիչների խմբեր են գործում, որոնք փորձում են երեկվա պես «հնդկական կինոյի» սցենարի մեջ ներքաշել մեր կողմնակիցներին: Այս մասին, այսօր՝ ապրիլի 18-ին, Երեւանի քաղաքապետարանի մոտ հայտարարեց «Իմ քայլը» նախաձեռնության ղեկավար, «Քաղաքացիական պայմանագիր» կուսակցության առաջնորդ Նիկոլ Փաշինյանի գլխավորությամբ: «Այս փուլում փոքր խմբերով մի մնացեք, եկեք մեր երթին միացեք, մասնակցեք միասնական հավաքին»,- ասաց նա:

Փաշինյանը ցուցարարներին կոչ արեց փակել քաղաքապետարանի մուտքը, այդ ընթացքում ոստիկանները արագ շղթա կազմեցին քաղաքապետարանի շենքի առջեւ:

Ցույցի մասնակիցներն սկսեցին վանկարկել՝ «Տարոն, դուրս արի»:

Նշենք, որ նախօրեին բողոքի ակցիա է տեղի ունեցել նաեւ Մարսելի ՀՀ հյուպատոսսւթյան առջեւ, որին մասնակցել են մի քանի տասնյակ քաղաքացիներ: Ակցիայի մասնակիցները հյուպատոսարանից պոկել են Սերժ Սարգսյանի նկարը, ապա այրել այն։

Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցության առաջնորդ Նիկոլ Փաշինյանն իր աջակիցների հետ միասին ապրիլի 13-ից բողոքի ակցիաներ է իրականացնում Երեւանի փողոցներում՝ արգելափակելով փողոցներն ու հրապարակները: Նրանք բողոքում են Սերժ Սարգսյանի վարչապետ դառնալու դեմ: Բողոքի ակցիաների ընթացքում բախումներից տուժել է 46 մարդ, այդ թվում Նիկոլ Փաշինյանը: Մի քանի տասնյակ մարդիկ բերման են ենթարկվել:

Կա հարուցված քրեական գործ Հանրային ռադիո մուտք գործելու եւ Մաշտոց-Թումանյան խաչմերուկում միջադեպի փաստերով՝ ՀՀ քրեական օրենսգրքի 225-րդ հոդվածի հատկանիշներով:

Նշենք, որ ապրիլի 17-ին ԱԺ հատուկ նիստում Սերժ Սարգսյանը ՀՀ վարչապետ է ընտրվել 77 կողմ, 18 դեմ ձայներով: