Հայաստանի հավաքականի նախկին երեք ֆուտբոլիստներ, բազմաթիվ հայտնի անձինք աջակցում են ցուցարարներին։ Այդ մասին Հանրապետության հրապարակում ընթացող հանրահավաքում ասել է ԱԺ պատգամավոր Նիկոլ Փաշինյանը։
Նրա խոսքով, հատուկ նամակով իր աջակցությունն է հայտնել Հայաստանի հավաքականի նախկին ֆուտբոլիստ Յուրա Մովսիսյանը, նախկին խաղացողներ Ռոբերտ Արզումանյանը, Լեւոն Փաչաջյանը։
Ըստ Փաշինյանի, աջակցում են նաեւ դերասաններ Հրանտ Թոխատյանը, Արման Նշանյանը, իսկ դերասան Սարգիս Գրիգորյանը Սերժ Սարգսյանին հորդորել է հրաժարական տալ։
«Մեզ միացել են նաեւ դերասան Սոս Ջանիբեկյանը, Էմփիրեյ խմբի մենակատար Սարգիս Մանուկյանը, դերասան Հովհաննես Ազոյանը, Հայկ Մարությանը, օպերային երգչուհի Լիլիթ Պիպոյանը, դերասանուհի Ալինա Մարտիրոսյանը, Ջուլիետա Ստեփանյանը, դերասան Սերգեյ Դանիելյանը, Սարգիս Հակոբյանը»,- նշել է Փաշինյանը։
Հրապարակում հավաքվածները սկսել են վանկարկել՝ Հենո, միացի։ «Ձեր մտքերի ընթացքն ինձ դուր է գալիս, Հենրիխ Մխիթարյան, նայի՝ ինչ է կատարվում Երեւանում»,- արձագանքել է Նիկոլ Փաշինյանը։
