Մի տեսակ դժվար է պատասխանել պահանջին, երբ վերջնագիրը մինչեւ վերջ հստակ չէ: Այս մասին ապրիլի 23-ին մամուլի ասուլիսի ժամանակ ասաց պաշտպանության նախարար Վիգեն Սարգսյանը՝ պատասխանելով երկրի իրավիճակի կարգավորման հնարավոր ուղիների մասին հարցին:
Նրա խոսքով՝ վերջնական տարբերակը կունենա նա, ով այս ամենը նախաձեռնել է: Ըստ որում՝ Վիգեն Սարգսյանը նշեց, որ բողոքի շարժման նախաձեռնող Նիկոլ Փաշինյանը, հնարավոր է, մտքում միայն մեկ տարբերակ ունի: «Կարեւոր է, որ նա ազդակներ ուղարկի՝ տեսանելի կամ ավելի լավ է անտեսանելի»,- նշեց Սարգսյանը:
Նա շեշտեց, որ հրապարակը չի իշխանությունը ձեւավորում: Նրա խոսքով՝ եթե Փաշինյանն առաջընթացին օգնող քայլեր ունի, թող դրանք ներկայացնի, իշխանությունները պատրաստ են դրանց քննարկմանը: Բայց հարցի՝ «իշխանությունը տվեք» դրվածքը անարդյունավետ է:
Դրա հետ մեկտեղ նախարարն ընդգծեց, որ ցանկացած հասարակական ակցիա անհետք չի մնում: «Էկեկտրիկ Երեւանը», «Սասնա ծռերը», մարտի 1-ի ողբերգությունը կամ 1996 թվականի հանրահավաքները, Ազգային ժողովի գրավումը, Լեւոն Տեր-Պետրոսյանի հրաժարականը սպիներ են թողել եւ միաժամանակ ժողովրդավարության զարգացմանն ուղղված քայլեր են եղել: Ի վերջո՝ մարտի 1-ի իրադարձություններից հետո Եվրոպայի համագործակցությամբ օրենսդրությունը բարելավվել է: Այն ավելի առաջավոր է, քան այն երկրների օրենքները, որոնցից մենք օրինակ ենք վերցնում»,- նշեց Սարգսյանը՝ հավելելով, որ անհրաժեշտ է ջանալ զգացմունքներին չտրվել: «Ամենասարսափելին ստեղծված իրավիճակում միավորներ հավաքելն է»,- նշեց նախարարը՝ դրական արտահայտվելով երեկվա հանրահավաքների կազմակարպման մասին այն իմաստով, որ նրանք թույլ չտվեցին տարբեր քաղաքական ուժերի կողմից ամբիոնն օգտագործել:
