Ցուցարարները «Իմ քայլը» նախաձեռնության առաջնորդ, ԱԺ պատգամավոր Նիկոլ Փաշինյանի գլխավորությամբ, հասել են Էրեբունի վարչական շրջան: Նրանք վանկարկում են «Մերժիր Սերժին, Կարենին», «Նիկոլ վարչապետ», «դասադուլ»:

«Ժողովուրդը հաղթել է եւ հաղթանակ արդյունքները պիտի արձանագրվի»,- ասել է Փաշինյանը։ Նա նաեւ մերժել է արտահերթ ընտրություններ անցկացնելու ՀՀԿ-ի առաջարկը։

Ըստ Փաշինյանի, Հանրապետականը ժամանակի վրա է խաղում։ «Ուզում են Կարեն Կարապետյանին նշանակել վարչապետ և մտածում են, որ ժողովուրդն էդքան միամիտ է, որ կհամաձայնվի մի հանրապետականին մեկ ուրիշ հանրապետականով փոխարինելու։ Կարեն Կարապետյանը լավ չի հասկացել, մենք ինչ ենք ասում։ Վարչապետը պետք է ընտրվի Ազգային ժողովում, պետք է օրենքի համապատասխան առաջադրվի Ազգային ժողովի խմբակցությունների կողմից, իսկ ժողովուրդը հրապարակում մինչև էդ պետք է համաձայնություն տա որեւէ թեկնածուի»,-ա սել է Փաշինյանը՝ չբացառելով, որ «Ելք» անունից կարող են որեւէ թեկնածու առաջադրել։

Դիտարկմանը, թե Կարեն Կարապետյանն աառաջարկել է արտահերթ ընտրություններ անցկացնել, Փաշինյանը պատասխանել է. «Կարծում եմ, որ մեր առաջին ռեակցիան այն է, որ մենք կբոյկոտենք այդ ընտրությունները, ընդ որում ակտիվ բոյկոտի միջոցով, այսինքն՝ այդ ընտրությունները չեն կայանա»։

Նշենք, որ այսօր հայտարարությամբ շարժմանն են միացել «Ելք» դաշինքի մյուս երկու ուժերը՝ «Հանրապետությունը» եւ «Լուսավոր Հայաստանը»: Իսկ ԲՀԿ-ն իր կողմնակիցներին կոչ արել հանրապետության բոլոր մարզերում եւ Երեւանում մոբիլիզացվել եւ դուրս գալ փողոց, լինել ժողովրդի կողքին:

Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:

Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել: Փաշինյանն իր հերթին հայտարարել է, որ վերսկսում են բողոքի գործողությունները, քանի որ ՀՀԿ-ն Սերժ Սարգսյանի հրաժարականի գնով ուզում է պահպանել իշխանությունը:

Փաշինյանը կոչ է արել այսօր՝ ապրիլի 25-ին վերսկսել քաղաքացիական անհնազանդության ակցիաները եւ թույլ չտալ, որ ՀՀԿ-ն մնա իշխանության:

• Եթե արտահերթ ընտրություններ լինեն ՀՀԿ-ի իշխանության պայմաններում, դրանք պարզապես չեն կայանա. Փաշինյան
• Մենք ինչի՞ ենք ուզում հասնել՝ դիկտատուրայի՞. Կարեն Կարապետյանը՝ Փաշինյանի հայտարարության մասին
• Արմեն Սարգսյանն այսօրվանից խորհրդակցություններ է սկսում