Վաղը՝ ապրիլի 25-ին «Իմ քայլը» նախաձեռնությունը բողոքի գործողությունները սկսելու է ժամը 12-ից։ Այդ մասին Հանրապետության հրապարակում ընթացող հանրահավաքում հայտարարել է ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանը (ֆոտոռեպորտաժ)։
«Վաղը առավոտից նոր թափով եւ ծավալներով շարունակվում են գործադուլները, դասադուլները։ Եւս մի քայլ ենք անում եւ ավարտին ենք հասցնում այս պատմությունը»,- ասել է նա եւ հավելել. «Ես ինքս գործողությունները կսկսեմ ժամը 12:00-ից, անելու են ճանապարհների, կամուրջների շրջափակում։ 80 բեռնատար է հավաքվել Երեւան-Սեւան մայրուղու վրա, եւ կոչ եմ անում մտնել Երեւան եւ շրջափակել բոլոր փողոցները, որ հնարավոր է շրջափակել։ Ինքս կսկսեմ Լամբադա կամրջի սկզբնամասից»։
Նա նաեւ կոչ է արել բոլոր վարորդներին՝ վաղը առավոտյան, ժամը 12:05-ից բոլոր մեքենաները ամբողջ հանրապետության տարածքում քսան րոպեով ուղղակի կանգնել եւ դադարեցնել երթեւեկությունը։
Իսկ ժամը 19-ին հավաքվում են հանրահավաքի Հանրապետության հրապարակում։
Այսքանով հանրահավաքն ավարտվեց եւ Հանրապետության հրապարակում մեկնարկեց «Նեմրա» խմբի համերգը։