Տնտեսական ոլորտում շատ պարզ լուծումներ կան, եւ կան որոշակի նոր գաղափարներ: Պարզ լուծումը, որ Հայաստանում ընդհանրապես որեւէ մենաշնորհ չպետք է լինի: Ռուսական ՌԲԿ-ին տված հարցազրույցում այս մասին հայտարարել է ԱԺ պատգամավոր, «Իմ քայլը» շարժման առաջնորդ Նիկոլ Փաշինյանը՝ խոսելով տնտեսական նախաձեռնությունների մասին, որոնք կառաջարկի, եթե մինչեւ արտահերթ խորհրդարանական ընտրությունների անցկացումը վարչապետ դառնա:
Նա հիշեցրել է, 20 հազար անուն ապրանք Հայաստան է ներկրվում գործարարների շատ նեղ շրջանակի կողմից: «Փաստացի այլոց համար արգելված է դրանք ներկրել: Carrefour-ը շաքարավազի առեւտրի ոլորտի խոշորագույն ընկերություններից է: Բայց Carrefour-ին փաստացի արգելված է Հայաստան շաքարավազ ներկրել: Հարկավոր է նրան եւ այլ ընկերությունների նույնպես թույլ տալ դա անել, եւ մենք անպայման կհասնենք դրան: Բացի այդ՝ մտադիր ենք առեւտրի ոլորտն այնպես բարեփոխել, որպեսզի ստվերային տնտեսությունը վերանա»,- ասել է նա:
Փաշինյանը հավելել է, որ դրա համար առաջարկվում է Հայաստանի վճարային համակարգում միասնական բոնուսային համակարգ ձեւավորել՝ տաքսի ծառայություններում, խանութներում, ծառայությունների ոլորտում: «Տարեկան գնումների որոշակի տոկոս կկուտակվի ձեր բանկային հաշվի վրա, որը կկարողանաք վերցնել, երբ ցանկանաք: Դա հարկավոր է, որպեսզի գնորդը շահագրգռված լինի գործարքների գրանցման հարցում: Հարկային մարմինները կգրանցեն այդ գործարքները եւ, համապատասխաբար, հարկեր կգանձվեն: Մենք հաշվարկել ենք, որ մեկ տարվա ընթացքում դա կհանգեցնի բյուջեի գրեթե 30%-անոց աճին: Դա նշանակում է աշխատավարձերի, կենսաթոշակների բարձրացում եւ այլն»,- ասել է Փաշինյանը:
Պատասխանելով ռուսական բիզնեսից, մասնավորապես՝ գազից Հայաստանի կախվածության եւ դրա նվազեցման անհրաժեշտության մասին հարցին, Նիկոլ Փաշինյանը նշել է, որ հարկավոր է վերլուծել, թե հայկական ներքին շուկայում գազի գինը ինչպես է ձեւավորվում:
«Քանի որ սահմանին ռուսական գազն իսկապես բավական էժան է: Երբ այն հասնում է շարքային սպառողներին, գինը կրկնապատկվում է: Եվ դա կասկածելի փաստ է: Մենք կաշխատենք հասկանալ, թե ինչու է այդպես, եւ հույս ունեմ, որ հնարավորություն կունենանք ներքին շուկայում նվազեցնել գինը»,- ասել է նա: