Ռուսաստանի պատգամավորների հետ հանդիպման ժամանակ Հայաստանի խորհրդարանի բոլոր ներկայացուցիչները հաստատել են ՌԴ-ի հետ դաշնակցային հարաբերությունները պահպանելու ձգտումը: Այս մասին հայտարարել է Ռուսաստանի Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահ Լեոնիդ Կալաշնիկովը, հաղորդում է ՏԱՍՍ-ը:
«Նրանցից յուրաքանչյուրն իր ընկալումն ունի եւ դրանք տեղավորվում են մեկ հրաշալի պարադիգմում», - ասել է Կալաշնիկովը՝ պատասխանելով հայ պատգամավորների հետ հանդիպման արդյունքների մասին հարցին:
«Բոլորը, եւ վարչապետի պաշտոնակատար Կարեն Կարապետյանը, հաստատեցին, ամեն դեպքում խոսքերով, որ նրանց համար առաջնային է Ռուսաստանի Դաշնության հետ դաշնակցային հարաբերությունների պահպանումը, բոլոր ինտեգրացիոն կազմավորումների պահպանումը»
Դրա հետ մեկտեղ Կալաշնիկովը չի բացահայտել՝ արդյոք վարչապետի թեկնածուի շուրջ ձեւավորված կոնսենսուս կա եւ չկա արդյոք Հանրապետական կուսակցության հետ կոնֆլիկտի հավանականություն:
«Ապրիլի 28-ին ռուս պատգամավորները հասցրեցին հանդիպել «Ելք», «Դաշնակցություն» խմբակցությունների, ինչպես նաեւ Հանրապետական կուսակցության եւ «Ծառուկյան» դաշինքի ներկայացուցիչների հետ: Օրվա կեսին պատվիրակությունը հանդիպեց Կարապետյանի հետ»:
Կալաշնիկովը պատճառաբանելով բոլոր քաղաքական ուժերի հետ զրույցների բովանդակության գաղտնիությունը, հրաժարվել է բացահայտել խոսակցությունների մանրամասները:
«Ինչպես եւ խմբակցությունների դեպքում, մենք պարզապես ցանկանում էինք լսել իրավիճակի գնահատականը, թե ինչպես է Կարապետյանը տեսնում դրա լուծումը», - ասել է ռուս պատգամավորը:
