Լոնդոնի ֆոնդային բորսան (LSE) հայտնել է, որ վաղվանից դադարեցնում է En+ Group ընկերության գլոբալ դեպոզիտային անդորրագրերով վաճառքը, որն ապրիլին հայտնվել էր ԱՄՆ պատժամիջոցների ներքո, փոխանցում է «Կոմերսանտը»:
LSE-ի մամուլի հաղորդագրության մեջ հստակեցվում է, որ անդորրագրերով վաճառքը կդադարեցվի մայիսի 2-ին, տեղական ժամանակով 17:15-ին: Բորսայից հավելել են, որ կշարունակեն հետեւել En+ Group-ի շուրջ ստեղծված իրավիճակին:
Ապրիլի 6-ին ԱՄՆ ֆինանսների նախարարությունը պատժամիջոցային ցուցակի մեջ էր ներառել 38 ռուսաստանցիների եւ ռուսական ընկերությունների, այդ թվում՝ Օլեգ Դերիպասկայի «Ռուսալ» եւ En+ Group ընկերությունները: Ավելի ուշ ամերիկյան նախարարությունը հայտարարել էր «Ռուսալի» դեմ պատժամիջոցները հանել, եթե այն դադարի կառավարել Դերիպասկան: Ռուսաստանի Հակամենաշնորհային դաշնային ծառայության ղեկավար Իգոր Արտեմեւը չէր բացառել, որ ընկերությունում բիզնեսմենի բաժինը, հնարավոր է, ազգայնացվի, սակայն Կրեմլից նշել էին, որ նման հարց չի քննարկվում: Ինչպես ավելի վաղ հայտնի էր դարձել «Ъ»-ին, Օլեգ Դերիպասկան համաձայնվել էր En+ի գլխամասային հոլդինգում իր բաժնեմասի նվազեցմանը:
ԱՄՆ ֆիննախն, իր հերթին, հայտարարել էր «Ռուսալը» սնանկացնելու մտադրությունների բացակայության մասին:
ԱՄՆ ֆինանսների նախարար Սթիվեն Մնուչինը նշել էր, որ ԱՄՆ պատժամիջոցներն ուղղված են ոչ թե «Ռուսալի» դեմ, այլ դրա սեփականատերերի:
«Մենք հասկացանք, որ արդյունքում հետեւանքներ են առաջացել ընկերությունում բարեխղճորեն աշխատող շատերի համար»,- ասել է նա՝ հավելելով, որ ընկերությունը խնդրել է իրեն պատժամիջոցների ցուցակից հանել:
Մնուչինը հրաժարվել էր թվարկել ԱՄՆ պահանջների ցուցակը:
Նա ասել էր, որ ԱՄՆ-ն ընկերության հետ երկխոսություն է վարում, որը «հույս է ներշնչում», ուստի ԱՄՆ-ն «լիցենզիան երկարաձգել» է՝ ամերկացի ներդրողների համար «Ռուսալի» հետ հարաբերությունների խզման թույլատրելի ժամկետը երկարաձգվել է մինչեւ հոկտեմբերի 23: Ամերիկյան կողմի կարծիքով՝ դա ժամանակ կտրամադրի հարցերը լուծելու համար: