Եկել եմ ձեզ օգնելու, քանի որ դուք կտրվել եք իրականությունը. Հանրապետության հրապարակում հիմա տեղադրված է մեծ էկրան, որտեղ մի քանի հազար մարդ դիտում է ձեզ, նրանք տեսնում են, թե ինչպես եք քվեարկելու, ձեր անուններն են իմանալու: Այս մասին այսօր՝ մայիսի 1-ին ԱԺ-ում վարչապետի ընտրության հարցի քննարկման ժամանակ նշել է «Ելք» խմբակցության պատգամավոր Արարատ Միրզոյանը:
Նրա խոսքով՝ Մեղրիից մինչեւ Աշոցք փողոցներում, սրճարաններում նայում են պատգամավորներին, եւ ուզում են մի բան, որ նրանք քվեարկեն Նիկոլ Փաշինյանի օգտին:
«Ասում եք՝ մի խումբ մարդիկ, այդ դուք եք մնացել մի խումբ մարդիկ: Ոստիկանության շարքերով, գյուղապետերով, ձեր երեխաների կուրսեցիներով, հարեւաններով, բարեկամներով, բոլորն ուզում են, որ դուք քվեարկեք Փաշինյանի օգտին: Դուք նայելու եք այդ մարդկանց աչքերին, եւ Սերժ Սարգսյանը չի լինելու ձեր կողքը, չի լինելու խմբակցության ղեկավարը: Դուք իշխանություն չեք, պրծել է: Դուք կարող եք լինել մեր ընդդիմադիր գործընկերները, եթե ձեզ ճիշտ պահեք: Հետագա դիմադրությունը միայն վնասելու է պետությանը, ՀՀԿ-ին ու ժողովրդին: Եթե ձեզ համար կարեւոր չի պետության դրոշը, մտածեք ձեր որոշման քաղաքական արժեքի մասին: Չկա այլեւս Սերժ Սարգսյանի իշխանություն: Դուք միաձայն չեք քվեարկելու»,- հայտարարեց Արարատ Միրզոյանը:
Նա վստահություն հայտնեց, որ միեւնույն է, իրենք հաղթելու են. «Եթե այսօր Նիկոլ Փաշինյանը չընտրվի վարչապետ, 7 օրից է ընտրվելու, եթե 7 օրից ուրիշ անուն բերեք, զոռով ընտրացնեք, մերժելու ենք, ձեւերը գիտենք արդեն: Եթե չընտրեք 7 օր հետո, նոր ընտրություններ են լինելու եւ չեք կարողանալու անցկացնել այնպես, ինչպես սովոր եք: Կեղծիք չի լինելու, կաշառք չի լինելու, տոտալ վերահսկվելու են բոլոր տեղամասերը: Շանս չկա, մենք, միեւնույն է, հաղթելու ենք, տակը մնալու է պետությանը ձեր տված վնասը կամ օգուտը, տակը մնալու է ձեր անձնական քաղաքական պատասխանատվությունը պատմության առջեւ, սերունդների առջեւ, երեխաների առջեւ»: