«Ելք» խմբակցության պատգամավոր Արամ Սարգսյանը չի կարող ասել, կլինի Նիկոլ Փաշինյանի գլխավորած Կառավարության կազմում, թե ոչ: Լրագրողների հետ զրույցում նա նշել, որ իրեն ավելի հոգեհարազատ է գործադիրի դաշտը:
«Այս պահին, էս դրությամբ չեմ կարող որեւէ նման բան ասել: Ինձ մշտապես ավելի հոգեհարազատ է եղել գործադիրի դաշտը, քան օրենսդիրինը, որովհետեւ օրենքների առումով ես 10 պատվիրաններից այն կողմ աշխատում եմ չխորանալ: Բայց Ազգային ժողովում կարծում եմ՝ ասելիք ունեցել եմ, ասել եմ իմ ասելիքը, ես ծառայելու եմ Հայաստանի Հանրապետությանը, ծառայելու եմ ընդդիմադիրի, թե իշխանության կարգավիճակով: Ես պատասխանատվություն եմ վերցնում իմ վրա ժողովրդի էս զարթոնքը, հաղթանակը առաջ տանելու, դրական արդյունքներ տալու ու էդ խնդրում իմ պատգամավորի նստած տեղից մինչեւ ցանկացած պաշտոնի գործադիր, թե օրենսդիրի կազմում պատրաստ եմ կատարել»,-ասաց նա:
Նշենք, որ ՀՀ Ազգային ժողովի մայիսի 8-ի հատուկ նիստում կայացած անվանական, բաց քվեարկությամբ «Ելք» խմբակցության ղեկավար Նիկոլ Փաշինյանն ընտրվեց ՀՀ վարչապետ: Փաշինյանի օգտին կողմ քվեարկեց 59, դեմ՝ 42 պատգամավոր:
