ԱՄՆ-ի կողմից Իրանի դեմ ցանկացած նոր պատժամիջոց կդիտարկվի որպես ՄԱԿ-ի Անվտանգության խորհրդի 2231 բանաձեւի խախտում եւ կհակասի միջազգային կանոնակարգերին: Այս մասին իր թուրք գործընկեր Թայիփ Էրդողանի հետ հեռախոսազրույցի ընթացքում հայտարարել է Իրանի նախագահ Հասան Ռոհանին, փոխանցում է «ՌԻԱ Նովոստի»-ն:
«ԱՄՆ-ի կողմից Իրանի դեմ ցանկացած պատժամիջոց կխախտի ՄԱԿ-ի Անվտանգության խորհրդի 2231 բանաձեւը եւ միջազգային դրույթները», - ասել է Ռոհանին, նշվում է Իրանի նախագահի տեղեկատվական պորտալում տարածված հայտարարության մեջ:
Նշենք, որ ԱՄՆ նախագահ Դոնալդ Թրամփը երեքշաբթի հայտարարել էր, որ Վաշինգտոնը մտադիր է դուրս գալ Իրանի հետ միջուկային ծրագրի շուրջ 2015 թվականին կնքված համաձայնագրից: Նա հայտնել է, որ, նույնիսկ լիովին հետեւելով միջուկային գործարքի պայմաններին, Իրանը գտնվում է միջուկային զենք ստեղծելու շեմին: Նրա խոսքով՝ ԱՄՆ-ն կվերադարձնի Իրանի նկատմամբ պատժամիջոցներն «ամենաբարձր մակարդակով»: