Աշխարհի առաջատար ուժերից մեկի կողմից Իրանի հետ միջուկային գործարքից դուրս գալու մասին միակողմանի որոշումն իր պարտավորությունների խախտման վատ օրինակ է, ինչը խաթարում է միջազգային իրավունքի հիմքերը: Նման կարծիք հինգշաբթի օրը գերմանական Աախեն քաղաքի համալսարանի ուսանողների հետ հանդիպման ժամանակ հայտնել է Ֆրանսիայի նախագահ Էմանուել Մակրոնը: Նրա ելույթը հեռարձակվում էր ֆրանսիական BFM հեռուստաալիքով, փոխանցում է «ՏԱՍՍ»-ը:
Խոսելով ԱՄՆ-ի՝ Իրանի հետ միջուկային գործարքից դուրս գալու որոշման մասին՝ Ֆրանսիայի նախագահը եւս մեկ անգամ շեշտել է, որ որոշումը համարում է «քայլ սխալ ուղղությամբ»:
«Մենք առաջատար համաշխարհային տերություններ ենք, եւ երբեք ճիշտ չի լինի, եթե մենք ինքներս չհետեւենք միջազգային կանոններին, ինչին մենք աջակից ենք, քանի որ մենք ինչ-որ իմաստով միջազգային կարգի երաշխավորներ ենք: Այդ դեպքում ինչպե՞ս բացատրել որոշ տերություններին, որոնք երբեմն կտրուկ եւ դաժանորեն կարող են գործել, որ իրենք չեն հետեւում միջազգային իրավունքին եւ պետք է հետեւեն մեր օրինակին, երբ մենք ինքներս դրան չենք հետեւում», - հարցադրում է կատարել Մակրոնը՝ հավելելով, որ ԱՄՆ նախագահ Դոնալդ Թրամփի վարչակազմի որոշումը «սկզբունքայնորեն սխալ է» համարում: