Հայաստանի քաղաքական ղեկավարությունը միշտ մեծ զիջումների է գնացել ղարաբաղյան հակամարտության կարգավորման հարցում, սակայն Բաքվի համար դա բավարար չի եղել: Այս մասին «Արդյո՞ք Արցախը կվերադառնա բանակցայի սեղանին. իրադարձությունների հնարավոր զարգացումը ղարաբաղյան հակամարտության կարգավորման գործընթացի շուրջ» թեմայով քննարկման ժամանակ այս մասին ասաց «Մոդուս Վիվենդի» հետազոտական կենտրոնի ղեկավար Արա Պապյանը:
Փորձագետը, մասնավորապես, հիշեցրեց Մադրիդյան սկզբունքների եւ Կազանում ստորագրված փաստաթղթի մասին, որոնց համաձայն հայկական կողմը պատրաստ էր տարածքային զիջումների գնալ Ադրբեջանի հետ՝ ԼՂՀ քաղաքական կարգավիճակի ճանաչման դիմաց: «Մենք մտադիր էինք փոխանցել նրանց յոթ շրջանները եւ պահել միայն ԼՂՀ-ն, սակայն Ադրբեջանը դրան էլ չհամաձայնեց եւ չի համաձայնելու»,- նշեց Պապյանը:
Ընդ որում, ըստ փորձագետի, ղարաբաղյան կարգավորման բանակցային գործընթացը միշտ արհեստական բնույթ է կրել եւ ի զորու չէ հանգեցնել որեւէ ցանկալի արդյունքի: Պատճառն այն է, որ ադրբեջանական կողմը բանակցային գործընթացը երբեք չի համարել այս հակամարտության կարգավորման ուղի: «Ադրբեջանի համար ղարաբաղյան խնդիր չկա. Ադրբեջանի համար կա միայն հայկական հարց: Իսկ ղարաբաղյան խնդիրն առիթ դարձավ տարածաշրջանում հայկական պետականության ոչնչացման համար»,- ընդգծեց քաղաքագետը:
Հիշեցնենք, որ Լեռնային Ղարաբաղ կատարած այցի ընթացքում Հայաստանի նորընտիր վարչապետ Նիկոլ Փաշինյանը հայտարարել էր, որ Հայաստանը կաջակցի ԼՂՀ անկախության ճանաչմանը միջազգային հանրության կողմից: Նա ընդգծել էր, որ բանակցային գործընթացը՝ առանց դրանում ղարաբաղյան կողմի մասնակցության, անարդյունավետ կլինի:
