Հանրապետական խմբակցության քարտուղար Գագիկ Մելիքյանը համոզված է, որ Նիկոլ Փաշինյանի գլխավորած կառավարությունը շատ կարճ ժամանակահատվածում հաջողություն կարող է արձանագրել, եթե լավ աշխատի։ NEWS.am–ի հետ զրույցում Գագիկ Մելիքյանը վստահեցրեց, թե ՀՀԿ–ից ծանր ժառանգություն չի ստացել կառավարությունը, իսկ աշխատելու դեպքում պտուղները չեն ուշանա։
Նորանշանակ նախարարների մեծամասնության երիտասարդ ու անփորձ լինելու մասին նախկին իշխանության ներկայացուցիչը կարծիք կհայտնի, երբ սկսեն աշխատել, իսկ մինչ այդ նրանց հաջողություն մաղթեց։
«Նոր կառավարությանը կմաղթեմ հաջողություն եւ այն հույսերը, որ արթնացրել են ժողովրդի մոտ, կցանկանամ, որ իրականություն դառնան»։
Դիտարկմանը՝ ի՞նչ ժամկետում է հաջողություն ակնկալում՝ հաշվի առնելով, որ ծանր ժառանգություն են ստացել ՀՀԿ–ի իշխանությունից, Մելիքյանն արձագանքեց. «Չեմ կարծում, որ ՀՀԿ–ից ծանր ժառանգություն են ստացել, լավ աշխատանքի դեպքում ամեն ինչ հնարավոր է։ Ես այդ կարծիքը չեմ կիսում։ Լավ աշխատանքի արդյունքում հաջողություններ կարելի է արձանագրել շատ կարճ ժամանակում»։
