Հայաստանի Հանրապետության վարչապետ Նիկոլ Փաշինյանը ԵԱՏՄ-ի շրջանակներում Սոչիում կայացած հանդիպմանը խոսել է խնդիրների առկայության եւ դրանց լուծման անհրաժեշտության մասին: Այս մասին մայիսի 16-ին լրագրողների հետ հանդիպման ժամանակ հայտարարել է վերլուծաբան Արա Պապյանը:
Ըստ նրա՝ պետք է հիշել, որ Փաշինյանի եւ Ռուսաստանի նախագահ Վլադիմիր Պուտինի հանդիպումը երկկողմ չէր: Սակայն այցը հնարավորություն ընձեռեց հաստատել, որ քաղաքականությունը հետեւողական բնույթ է կրում: «Սա շատ կարեւոր է, նույնիսկ եթե ուղղությունը հետագայում փոխելու ցանկություն կա: Տպավորությունն այնպիսին է, որ Պուտինն ավելի լարված տեսք ուներ, քան Փաշինյանը»,- նշել է Պապյանը:
Նրա խոսքով՝ իր ելույթում Փաշինյանը մի շարք շեշտադրումներ է արել՝ մասնավորապես, նշելով, որ հարաբերություններում խնդիրներ կան, եւ դրանք պետք է լուծվեն հավասարության սկզբունքների հիման վրա: «Նազարբաեւի հետ հանդիպում չի եղել»,- նշել է Պապյանը՝ հիշեցնելով, որ Ղազախստանն ակտիվորեն պաշտպանում է Ադրբեջանին: «Կցանկանայի, որպեսզի հաջորդ այցը կայանար Բրյուսելում: Արդեն հրավեր կա: Սա կկարգավորի արտաքին քաղաքականությունը եւ ԵՄ-ից նոր դոտացիաների համար հնարավորություն կընձեռի»,- նշել է Արա Պապյանը:
