Ֆինանսական եւ տեխնիկական հարցերով հայ-գերմանական միջկառավարական հանձնաժողովի հերթական նիստը, հավանաբար, տեղի կունենա այս տարվա երկրորդ կիսամյակում: Ժամկետների հարցը մայիսի 22-ին կայացած հանդիպմանը քննարկել են ՀՀ ֆինանսների նախարար Ատոմ Ջանջուղազյանն ու Հայաստանում Գերմանիայի արտակարգ եւ լիազոր դեսպան Բերնհարդ Մաթիաս Քիսլերին:
Դիվանագետը շնորհավորել է Ատոմ Ջանջուղազյանին՝ ֆինանսների նախարարի պաշտոնն ստանձնելու կապակցությամբ՝ նշելով, որ Գերմանիայի կառավարությունը պատրաստ է ոչ միայն պահպանել առկա տնտեսական կապերը, այլեւ քայլեր ձեռնարկել համագործակցության հետագա զարգացման ուղղությամբ:
Ատոմ Ջանջուղազյանը հայտնել է, որ Հայաստանի ֆինանսների նախարարությունը մտադիր է շարունակել իրականացնել օրակարգում առկա բոլոր ծրագրերը: Նախարարն ընդգծել է պետական ֆինանսների արդյունավետ կառավարման կարեւորությունը եւ նշել, որ այս հարցում մեծ ներդրում ունեն գործընկեր-պետություններն ու միջազգային ֆինանսական կառույցներն ինչպես ֆինանսական աջակցության, այնպես էլ մշակույթի եւ փորձի փոխանակման տեսանկյունից:
Զրուցակիցներն անդրադարձել են նաեւ ընթացիկ համագործակցության այլ հարցերի եւ կարեւորել համագործակցության ընդլայնման հեռանկարները:
