Դիրքորոշումը պարզ ու հստակ է. Հայաստանում քաղաքական բանտարկյալներ չպետք է լինեն՝ երեկ, այսօր եւ վաղը: Այս մասին մայիսի 24-ին լրագրողների հետ զրույցում հայտարարել է Հայաստանի նախագահ Արմեն Սարգսյանը:
Հարցին՝ արդյոք Հայաստանում այժմ կան քաղբանտարկյալներ, նախագահը պատասխանել է, որ ինքը որոշ իրավապաշտպան կազմակերպություններից փաստաթղթեր է ստացել, եւ դրանք շուտով կփոխանցվեն կառավարությանը, համապատասխան նախարարություններին: «Իհարկե, եթե Դուք լավ եք կարդացել Սահմանադրությունը, հարկավոր է սպասել վարչապետի եւ կառավարության որոշումներին»,- հայտարարեց Սարգսյանը՝ հավելելով, որ համաներման հետ կապված որոշ գնահատականներ կան:
Փորձերին ճշտել, թե ինչ է մտածում նախագահը երկրում քաղբանտարկյալների գոյության մասին, Արմեն Սարգսյանը պատասխանեց, որ նախագահը պետք է վարվի նախագահի նման, իսկ եթե զրուցակիցը հանիդպի իրեն որեւէ տեղ որպես քաղաքացու, ինքն անպայման կհայտնի իր անձնական տեսակետը: