Եվրասիական տնտեսական միության (ԵՏՄ) ընդլայնումը կարող է իրականացվել հետխորհրդային տարածքի երկրների հաշվին, սակայն Ռուսաստանը չի կարող որեւէ մեկին իր կամքին հակառակ ստիպել միանալ կառույցին: Այս մասին հայտարարել է Ռուսաստանի Դաշնության փոխարտգործնախարար Ալեքսանդր Պանկինը, ով մասնակցում է Սանկտ Պետերբուրգի միջազգային տնտեսական ֆորումին, փոխանցում է «ՏԱՍՍ»-ը:
«Այո, սա դեռ «հնգյակն» է (Ռուսաստան, Բելառուս, Ղազախստան, Հայաստան եւ Ղրղզստան): Այն կարող է ընդլայնվել: Հավանաբար, պոտենցիալ ընդլայնումը կարող է տեղի ունենալ հետխորհրդային տարածքի գործընկերների հաշվին, որոնք Խորհրդային Միությունում մեկ պետության կազմում էին»,- ասել է բարձրաստիճան դիվանագետը:
Ընդ որում, նրա խոսքով, կան փոխգործակցության նաեւ այլ ձեւեր: «Ազատ առեւտրի գոտիներ, առեւտրատնտեսական համագործակցության մասին համաձայնագրեր: Յուրաքանչյուրը հաշվարկում է իր օգուտները եւ, իհարկե, Ռուսաստանը չէ, որ պետք է որոշի, թե ով կմտնի ԵՏՄ, քանի որ սա հավասարազոր պետությունների միություն է, որոնք կոլեկտիվ կերպով կորոշեն, թե ում ընդունել այս կարգով, իսկ ում՝ մեկ այլ»,- նշել է Պանկինը: