Միջուկային գործարքից Իրանի դուրս գալը կամ նրան դուրս գալ ստիպելը կհանգեցնի նրան, որ ոչ ոք չի հասկանա, թե ինչով է այդ երկիրը զբաղվում միջուկային ոլորտում: Այս մասին հայտարարել է Ռուսաստանի նախագահ Վլադիմիր Պուտինը, փոխանցում է «ՌԻԱ Նովոստի»-ն:
«Արդյո՞ք Իսրայելի համար ավելի լավ կլինի, եթե Իրանը դուրս գա այս գործարքից կամ եթե նրան ստիպեն անել դա: Այդ դեպքում Իրանի միջուկային գործունեությունն ընդհանրապես անհասկանալի կլինի որեւէ մեկի համար: Մենք չենք իմանա, թե ինչ է տեղի ունենում այնտեղ, ինչ ռիսկեր կառաջանան»,- ասել է Պուտինը Սանկտ Պետերպուրգի Միջազգային տնտեսական համաժողովի ժամանակ:
«Մենք դեռ չենք կարողանում լուծել խնդիրները Հյուսիսային Կորեայի հետ: Այնտեղ խնդիրները շատ են, եւ ոչինչ կարգավորված չէ: Մի՞թե մենք նույն դասի երկրորդ խնդիրն ենք ուզում, գուցե անգամ՝ ավելի մեծ դասի՝ հաշվի առնելով տարածաշրջանի պայթունավտանգությունը, որի մասին մենք խոսում ենք: Հավանաբար՝ ոչ»,- հավելել է Պուտինը:
Պուտինը նշել է, որ չի համարում, որ ԱՄՆ նախագահ Դոնալդ Թրամփը պարտվել է՝ դուրս գալով իրանական միջուկային համաձայնագրից, «գուցե ներքաղաքական առումով նա հաղթել է, սակայն եթե գործարքը կործանեն, շատերը կպարտվեն»: Նա հիշեցրել է, որ ՄԱԳԱՏԷ-ն հաստատել էր, որ Իրանը կատարում է իր պարտավորությունները: «Ինչի՞ համար նրանք պետք է պատժվեն: Ես դա չեմ հասկանում»,- ասել է Պուտինը:
