«Օրինաց երկիրը» Հանրապետականի պոչն է, նրա հետ ինչպես ուզում, վարվում են, նրա նախարներին հանում են, դնում են։ Հունվարի 21-ին տեղի ունեցած մամուլի ասուլիսի ժամանակ այս մասին ասաց փորձագետ Կարեն Քոչարյանը։
«ՕԵԿ-ը յա եղած, յա չեղած, Հանրապետականի վերջին ցիստերն է»,- շարունակեց Քոչարյանը։
Անդրադառնալով ՀՅԴ-ին, նա նկատեց, որ քաղաքական այս ուժը միշտ հնարավորություն ունի անցնել խորհրդարան։ «Անցնելու հնարավորություն միշտ էլ կա՝ ուղղակի դա կախված է նրանից, թե ընտրություններին նախորդող վերջին 1,5 տարում ինչ դիրքորոշում է ցուցաբերում ՀՅԴ-ն։ Իրականում նա իրեն ցույց է տալիս որպես ընդդիմադիր ուժ։ Ինչ էլ, սակայն, լինի, ՀՅԴ առայժմ ունի իր փոքր, բայց կայուն ընտրազանգվածը»,- ասաց նա։
Ասուլիսին ներկա մյուս բանախոս, քաղաքական տեխնոլոգ Արմեն Բադալյանն էլ նկատեց, որ ՀՅԴ-ի կայուն ընտրազանգվածը գնալով պակասում է։ «2007 թվականի խորհրդարանական ընտրությունների ժամանակ այդ ուժն ստացավ 170 հազար ձայն, մեկ տարի անց՝ նախագահական ընտրություններին մասնակցելուց Վահան Հովհաննիսյանը հավաքեց 90 հազար ձայն, 2009-ի ավագանու ընտրությունների ժամանակ՝ ՀՅԴ թեկնածուն ստացավ 18 հազար ձայն՝ ի դեպ, Տիգրան Կարապետյանից ընդամենը 10 հազար ձայնով ավել։ Սա ցույց է տալիս, որ Դաշնակցությունը կայուն կերպով կորցնում է իր ընտրազանգվածը, այնտեղ լճացում է տեղի ունենում, իսկ պարտություններից դասեր չեն քաղվում։ Եվրոպական արժեքների մասին խոսող ՀՅԴ առաջնորդներն այս ամենից հետո պետք է որ հեռացած լինեին, ինչը, սակայն, չենք տեսնում։ Իրականում նրանք պետք է գնան»,- ամփոփեց քաղաքական տեխնոլոգը՝ ավելանելով, որ ՀՅԴ-ն հնարավորություն ունի «առողջանալու», եթե իրապես զբաղվի Հայ Դատով եւ փոխի ղեկավար կազմը։
Նշենք, որ խորհրդարանական ընտրությունները Հայաստանում կանցկացվեն 2012 թվականին։
