Կիեւի գործողություններում երբեմն սթափ դատողությունը եւ սեփական քաղաքացիների մասին մտահոգությունը դառնում են ռուսատյացության ուղղության պատանդը, հայտարարել է ՌԴ ԱԳ նախարար Սերգեյ Լավրովը՝ մեկնաբանելով ԱՊՀ-ից դուրս գալու Ուկրաինայի իշխանությունների որոշումը, փոխանցում է «ՌԻԱ Նովոստի»-ն:
«Ուկրաինայի ինքնիշխան իրավունքն է որոշել ինչ կազմակերպությունների անդամակցել: Ուկրաինան պետք է որոշում ընդունի, թե ԱՊՀ վերաբերյալ իր այս կամ այն քայլը սեփական քաղաքացիների վրա դրական, թե բացասական ազդեցություն կունենա: Այս հարցում մենք ոչինչ չենք կարող անել»,- հայտարարել է նա Մինսկում կայացած ճեպազրույցում:
«Մեր ուկրաինացի հարեւանների գործողություններում երբեմն սթափ դատողությունը եւ սեփական քաղաքացիների մասին մտահոգությունը դառնում են ռուսատյացության ուղղության պատանդը»,- դժգոհել է Լավրովը:
Ավելի վաղ Ուկրաինայի նախագահ Պյոտր Պորոշենկոն կառավարությանը հանձնարարել էր սկսել ԱՊՀ հիմնադիր մարմիններից Ուկրաինայի պաշտոնապես դուրս գալու ընթացակարգը եւ «վերջնականապես փակել» Մինսկում համապատասխան ինստիտուտներին առընթեր ուկրաինական ներկայացուցչությունը: Միաժամանակ Գերագույն ռադայում երկրի նախագահի ներկայացուցիչ Իրինա Լուցենկոն հայտարարել էր, որ Կիեւը մտադիր չէ չեղյալ հայտարարել համաձայնագրերը, որոնք վերաբերում են տարանցմանը, դիպլոմների ճանաչմանը եւ աշխատանքի տեղավորմանը: