Արաբական պետությունների լիգան (ԱՊԼ) պատրաստ է աջակցել Լիբիայում մինչեւ այս տարվա վերջըընտրությունների անցկացմանը: Այս մասին հայտարարել է կազմակերպության գլխավոր քարտուղար Ահմեդ Աբուլ Գեյթը Փարիզում կայացած միջլիբիական կարգավորման հարցով համաժողովի ժամանակ, փոխանցում է «ՌԻԱ Նովոստի»-ն:
«ԱՊԼ-ն պատրաստ կլինի աջակցել եւ վերահսկել ընտրությունները, եթե Լիբիայի կուսակցությունները համաձայնության գան տարվա վերջին դրանք անցկացնելու վերաբերյալ եւ պայմանով, որ անհրաժեշտ քաղաքական եւ իրավական պայմաններ ստեղծվեն եւ ապահովվի անվտանգությունը»,- ասել է Աբուլ Գեյթը, որի հայտարարությունները տարածել է կազմակերպության մամուլի ծառայությունը: Միեւնույն ժամանակ, ԱՊԼ-ի գլխավոր քարտուղարի խոսքով, կազմակերպությունում որեւէ խնդիր չեն տեսնում, եթե ընտրությունները հետաձգվեն մինչեւ 2019 թվականի սկիզբ:
Աբուլ Գեյթը հավելել է, որ ԱՊԼ-ն պատրաստ է աշխատել Լիբիայի ներսում հակառակորդների դիրքերի մոտեցմանն այն մասով, որը վերաբերում է քվեարկության անցկացմանը, ինչպես նաեւ խթանել դրանց արդյունքների ճանաչմանը՝ ինչպես երկրի ներսում, այնպես էլ միջազգային մակարդակով:
Ավելի վաղ հաղորդվել էր, որ Փարիզում կայացած բանակցություններում Լիբիայի ճգնաժամի կողմերը պայմանավորվել են երկրում ընտրություններն անցկացնել դեկտեմբերի 10-ին, իսկ մինչեւ սեպտեմբերի 16-ը սահմանադրական հիմք նախապատրաստել դրանց համար:
