Հայաստան-ԵՄ համաձայնագիրն արդեն վավերացրել են բալթյան երեք երկրները: Այս մասին այսօր՝ մայիսի 31-ին, ԱԺ-ում 2017 թվականի բյուջեի կատարողականի քննարկման ժամանակ նշեց ԱԳ փոխնախարար Արմեն Պապիկյանը՝ հավելելով, որ համաձայնագրի վավերացումը Հայաստանի արտաքին քաղաքական առաջնահերթություններից է:
Հարցին, թե երբ համաձայնագիրը կվավերացվի ԵՄ անդամ բոլոր երկրների կողմից, փոխնախարարը հստակ պատասխան չտվեց՝ նշելով, միայն, որ հույս ունի, որ 2019-ի ընթացքում դա տեղի կունենա. «Համաձայնագիրն արդեն մտել ժամանակավոր կիրարկման մեջ եւ պետք է առավելագույնս անենք, որ ուժի մեջ մտած դրույթները կիրառենք Հայաստանում: Ես չեմ կարող ասել, թե Գերմանիան կամ Պորտուգալիան երբ կվավերացնեն համաձայնագիրը: Ես կարող եմ պատասխանատվություն վերցնել եւ ասել, որ օրնիբուն կաշխատենք այդ ուղղությամբ: Հավանականությունը, որ չեն վավերացնի, ես շատ ցածր եմ գնահատում»,-ընդգծեց Պապիկյանը: