Սույն թվականի հունիսի 12-ին տեղի է ունեցել Միաբանական արտահերթ ժողով, որին մասնակցում էին նաեւ Մայր Աթոռում պաշտոնավարող քահանա հայրերը: Ժողովը հանդես եկավ հետեւյալ հայտարարությամբ.
«Խոր ցավով եւ վրդովմունքով անդրադարձանք հունիսի 10-ին Երեւանի Սուրբ Գրիգոր Լուսավորիչ մայր եկեղեցում Սուրբ Պատարագի ժամանակ բողոքի ակցիա կազմակերպած եկեղեցական ու աշխարհական անձանց անթույլատրելի գործողություններին: Հայտնի գործող անձանց կողմից ոտնձգություն կատարվեց Եկեղեցու սրբության նկատմամբ, որն ուղեկցվում էր Ամենայն Հայոց Կաթողիկոսի եւ եկեղեցականների հասցեին ուղղված վարկաբեկիչ արտահայտություններով: Նրանց կողմից փորձ արվեց խոչընդոտել Սուրբ Պատարագի թափորի ընթացքը եւ խաթարել եկեղեցում աղոթական մթնոլորտը: Այս քայլն ուղղված է Մայր Եկեղեցու դեմ՝ վիրավորելով նրա բազմաթիվ հավատացյալների հոգեւոր զգացումները: Փառք Աստծո, եկեղեցականների եւ հավատացյալների միջամտությամբ հնարավոր եղավ խուսափել ընդհարումից:
Խստորեն դատապարտում ենք կատարվածը եւ արձանագրում, որ Սուրբ Ավետարանի ոգուն եւ պատգամին հակառակ այդ բոլոր նախաձեռնությունները խրախուսում եւ ուղղորդում են Տ. Կորյուն աբեղա Առաքելյանը եւ մի քանի եկեղեցականներ:
Դժբախտաբար մինչ օրս Հայր Կորյունը եւ իր կողմնակիցներն անտեսում են ինչպես մեր՝ միաբաններիս, այնպես էլ եպիսկոպոսաց դասի, թեմակալ առաջնորդների, հոգեւոր հովիվների եւ մտահոգ հավատացյալների ջանքերն ու հորդորները:
Միաբանական ժողովը քննարկումների արդյունքում որոշեց նաեւ դիմել Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին՝ Կորյուն աբեղա Առաքելյանի հակականոնական եւ հակաեկեղեցական ընթացքը Մայր Աթոռ Սուրբ Էջմիածնի Կարգապահական հանձնախմբում քննության առնելու համար»:
